Pas përfundimit të seancës parlamentare, kryetari i Partisë Demokratike, Sali Berisha, në një prononcim për mediat jashtë Kuvendit, e cilësoi institucionin si një “narkoparlament”, duke akuzuar kryeministrin Edi Rama për shkelje të rregullores dhe Kushtetutës. Berisha u shpreh se Rama nisi ndryshimet në komisionet parlamentare pa miratuar më parë ndryshimet në rregullore, duke theksuar se parlamenti është “asgjësuar që dje”.
I pyetur për praninë e ambasadorëve në sallë, Berisha tha se ai flet për qytetarët shqiptarë dhe përsëriti akuzat për lidhje të mazhorancës me kartelet e drogës. Berisha kritikoi gjithashtu kryesimin e seancës nga deputeti Vasil Llaja, të cilin e cilësoi të papërgatitur dhe të manipuluar. Sipas Berishës, kjo është një tjetër dëshmi e degradimit të institucioneve në vend.
“Ky është një narkoparlament. A e morët vesh se si e filloi Edi Rama? E filloi që dje në Asamble duke shkelmuar rregulloren. Ka një rregullore. Asnjë komision nuk ndryshohet pa ndryshuar rregulloren. Asnjë komision! Po për këtë nuk ka rregullore, nuk ka Kushtetutë. Nuk ka gjë, morali i tij është droga dhe vetëm droga“, tha Berisha.
Pyetje: A ishte njëlloj qëndrimi, për shkak se ishin ambasadorët në sallë?
Berisha: Po lëreni, çfarë punë kisha unë me ata? Unë kisha punë me qytetarët e mi. Ata ishin të pranishëm dhe unë thashë që këtu janë kartelet e drogës. Atë nuk mund të mos e thosha. Të vret Zoti po të mos e thuash atë. Ky është parlamenti i atyre që thashë. Nuk është parlament. Si mund ta lija unë Vasil Llajën, një mjek i cili nuk ka asnjë eksperiencë parlamentare dhe e mashtrojnë siç duan. Ai nuk e di që parlamenti është rrëzuar që dje. Që në momentin që ai shpalli komisionet të cilat nuk ekzistojnë në rregullore. Kaq është puna. Ai asgjësoi edhe rregulloren e parlamentit.
Discussion about this post