Berisha: Rama s’mund të fitojë kurrë ndryshe, por vetëm duke burgosur kundërshtarët e tij politikë

Kryetari i Partisë Demokratike, Sali Berisha e ka përshkruar Shqipërinë si një “diktaturë të bandave,” duke akuzuar qeverinë për lidhje me krimin dhe mafian shqiptare e ndërkombëtare.

Gjatë fjalës së të mbajtur në protestën e sotme poshtë banesës së tij, Berisha theksoi se vendi ka humbur demokracinë, ku ligji është zëvendësuar nga një regjim i kontrolluar nga krimi dhe droga. Sipas tij, vota e lirë është konfiskuar, procesi zgjedhor është kthyer në farsë dhe Shqipëria është bërë peng i mafias.

Berisha ka akuzuar qeverinë për përdorimin e organizatave kriminale, si “Skrapi,” për të mbrojtur krimin elektoral dhe për të siguruar vazhdimësinë e pushtetit. Lideri demokrat theksoi se shqiptarët kanë humbur votën e lirë, dhe pa të, nuk ka shtet ligjor, liri apo të drejta njerëzore.

Berisha e vuri theksin dhe te mediat, duke thënë se ato janë të kontrolluara nga qeveria dhe censuruara ashtu si në diktaturën komuniste, ku ka shtuar edhe se drejtësia është e vonuar dhe e kapur. Krimi elektoral, sipas tij, nuk ndëshkohet, por shërben për të manipuluar zgjedhjet në favor të qeverisë.

Kryetari i PD, Sali Berisha i është drejtuar kryeministrit Rama mbi përdorimin e drejtësisë së kapur për të burgosur kundërshtarët politikë dhe për të mbrojtur krimin elektoral. Berisha tha se Shqipëria është bërë një vend pa drejtësi të vërtetë, ku liderët e opozitës janë të burgosur për arsye politike.

Kryedemokrati Sali Berisha thekson se kriminelët që punojnë për Ramën zbatojnë urdhra për të shtypur opozitën, ndërsa prokurorët marrin ryshfete për të mbyllur dosjet e kriminelëve dhe trafikantëve të drogës, ku ka paralajmëruar se përgjegjësit për këto veprime do të japin llogari një ditë.

Lideri opozitar tha se, Shqipëria është marrë peng nga krimi dhe mafia, si brenda ashtu edhe jashtë vendit, dhe akuzon Edi Ramën dhe qeverinë e tij për shkeljen e ligjit dhe Kushtetutës.

Berisha ka përmendur vjedhjen masive të pasurive publike dhe lirimin e kriminelëve, duke thënë se mafia dhe krimi kontrollojnë vendin për përfitimet e tyre.

Kryetari i PD, Sali Berisha bëri thirrje që shqiptarët të betohen për të çliruar vendin nga këta “pengmarrës” dhe për të shpallur mafian shqiptare dhe ndërkombëtare “non grata”, ku ka theksuar nevojën për sakrificë dhe përkushtim për një Shqipëri të lirë dhe të integruar në Europë.