Kryetari i Partisë Demokratike, Sali Berisha, gjatë prezantimit të programit të qeverisjes 2025-2029 për fuqizimin e grave dhe vajzave akuzoi me tone të ashpra kryeministrin Rama, si kryeministrin më mizogjen në histori. Berisha theksoi se gratë dhe vajzat shqiptare ndodhen në kushte të vështira, duke përmendur se shoqëria shqiptare është ende shumë e detyruar ndaj tyre.
Berisha tha se një fond prej 60 milionë eurosh që qeveria franceze kishte dhënë për gratë shqiptare, u vodh dhe nuk arriti në duar të grave. Kryedemokrati gjithashtu e kritikoi qeverinë për mungesën e projekteve që mbështesin gratë dhe vajzat, duke përmendur ndër to edhe rritjen e dhunës ndaj tyre dhe mungesën e angazhimit të qeverisë për të zgjidhur këto probleme.
Lideri demokrat theksoi rëndësinë e luftës kundër patriarkisë si një hap kyç për emancipimin e shoqërisë dhe avancimin e gruas dhe vajzës shqiptare. Ai e quajti patriarkalinë një “mur shekullor” që pengon liritë dhe të drejtat e njeriut, duke shkaktuar pabarazi të theksuara.
Berisha përmendi përpjekjet e mëparshme për të ulur hendekun e pagave mes burrave dhe grave dhe garantoi se betejat e ardhshme do të fokusohet në luftimin e çdo forme diskriminimi dhe sigurimin e mundësive të barabarta për gratë.
Berisha u shpreh se e sheh suksesin e grave dhe vajzave në Shqipëri si një potencial të jashtëzakonshëm, duke theksuar arritjet e tyre intelektuale dhe profesionale, si dhe rëndësinë e qëndrueshmërisë dhe angazhimit të tyre për të ndjekur karrierat.
Lideri historik i PD garantoi se Partia Demokratike do të mbështesë gratë dhe vajzat me politika që përmirësojnë kushtet e jetesës dhe bizneset e tyre, si dhe do të përpiqet të luftojë varfërinë ekstreme që prek një pjesë të madhe të grave shqiptare.
Kryetari i PD theksoi rolin kyç të grave, vajzave, nënave dhe motrave në projektin e tij për “Shqipërinë Madhështore.” Ai shprehu mirënjohjen për angazhimin dhe qëndrueshmërinë e grave brenda Partisë Demokratike gjatë 34 viteve të fundit, duke theksuar se ato kanë qenë pjesa më vitale dhe e qëndrueshme e partisë. Berisha premtoi që PD do të vazhdojë të mbështesë gratë në institucione dhe qeverisje, duke hequr kufizimet e kuotave dhe duke siguruar pjesëmarrjen e tyre të plotë.
Discussion about this post