Berisha: Ramën do e çojmë në ndjekje penale, asgjë nuk na ndal në…

Kreu demokrat Sali Berisha premtoi nga Gjirokastra, ku zhvilloi një takim me mbështetës të opozitës, se Edi Ramën do e dërgojmë në ndjekje penale, nuk ka deklaruar asgjë nga pasuria e thjeshtrës

“Bota e pa se Edi Rama nuk pranon të hetohet se ai ka vjedhur.

Bota e pa se ai nuk pranon të hetohen partneritetet që ka dhënë me firmën e tij, se ai nuk pranon të hetohen familjarët e tij.

Kushtetuta, ligji e përcakton qartë, familjarët e kryeministrit, ministrit, deputetit, nuk mund të përfitojnë nga tenderat publike.

Dhe nëse përfitojnë, mandati ikën.

Thjeshtra e tij, punësohet në studio të mëdha të huaja dhe ato studio vijnë këtu dhe fitojnë të gjithë tenderat.

Lënë të gjithë studiot tona me duarbosh sepse fitojnë vetëm ata që punësojnë thjeshtrën.

Dhe kur unë i them këtë gjë, ai del e thotë: nga familja ime, asnjeri nuk ka fituar asnjë qindarkë nga fondet publike.

Kur unë të nesërmen, dal dhe tregoj një pjesë të tenderave që ka fituar thjeshtra, thjeshtri del dhe thotë se familja ime përbëhet nga unë, Linda, Gregu dhe Zaho. E përjashton thjeshtrën.

Por ligji nuk e përjashton.

Dhe zotëria ka kryer dhe ne do e dërgojmë për ndjekje penale.

Ka kryer krime se ne kemi marrë deklarimet e tij”, tha Berisha.

Lidhur me mosbindjen civile, Berisha u shpreh se atë s’do e ndalë asgjë, pavarësisht se Edi Rama mund të mendojë se me izolimin e Sali Berishës do e bllokojë.

“Kjo është përpjekja e fundit ndaj Sali Berishës.

Akuzon dhëndrin e tij se ka marrë në një proces 15-vjeçar, në përputhje të plotë me çdo ligj të vendit, 408 metër tokë të konfiskuar nga regjimi komunist gjyshërve të tyre, të cilët e kanë paguar me burg.

Vetë Edi Rama, nga kjo tokë ka marrë 1200 metër katrorë me katër vendime qeverie.

Kjo është e vërteta.

Dhe tani, porosit gjykatës dhe prokurorë të përcaktojnë masa antikushtetuese kundër meje, duke besuar se me izolimin tim, mund të bllokojë mosbindjen civile të PD.

I bindur jam se kjo jo vetëm do bllokojë, por do fuqizojë më shumë këtë lëvizje dhe Edi Rama do i ketë ditët e shkurtra.

Pra, ne jemi në mision”, theksoi Berisha.