Ish-Kryeministri Sali Berisha paralajmëroi Kryeministrin Edi Rama se nëse i preket një fije floku Arben Ahmetajt dhe familjes së tij, ai do të mbajë përgjegjësi dhe nuk do të mund të ndalë më veprime të tjera.
Berisha tha se njëherë Edi Rama e bëri këtë me Ervis Martinajt, por në rastin e Ahmetajt po i them mos guxo more hajdut të përdorësh vrasësit.
Në fjalimin drejtuar mbështetësve, Berisha tha se me deklaratat e tij, Arben Ahmetaj tronditi PS-në, u tregoi shqiptarëve se kreu i vjedhjes së shekullit është Edi Rama dhe pronari i djegësit të Tiranës, Erion Veliaj
“Në intervistë mbrëmë ish-zëvendësi i Edi Ramës, tronditi anë e kënd PS-në, tronditi thellë ata socialistë të cilët për bindjet e tyre e kanë patur të vështirë të besojnë denoncimet e PD-së, të besojnë denoncimet e Sali Berishës se, kreu i vjedhjes së shekullit është Edi Rama, se pronar i djegësit të Tiranës është Erion Veliaj dhe Edi Rama.
Se mbrojtjes të vjedhjes së shekullit janë Dumanër e kompani.
Por, mbrëmë patën rastin të dëgjojnë nga goja e një socialisti i cili ç’është e vërteta ka qenë objekt sulmesh të merituara dhe të pandërprera nga Sali Berisha në të gjithë karrierën e tij politike, Arben Ahmetaj.
Por Arben Ahmetaj mbrëmë nuk ju tha të vërtetën ju dhe as demokratëve, se ju e keni dëgjuar dhe besuar, por ju tha të vërtetën socialistëve të cilëve ju drejtua se afera e djegësave është një aferë llahtarisht, është një aferë e mafias më të rrezikshme të Shqipërisë.
Se ka për kokë Edi Ramën dhe fallangat e tjera të krimit pas tij”, tha Berisha.
Ish-Kryeministri deklaroi se kjo vjedhje e shekullit kurrë nuk mund të ndodhte pa angazhimin direkt, personal, pa firmat fap, fap, fap, e paf, paf, paf, të kryehajdutit të kombit, Edi Rama.
“Edi Rama që në 2014 përmbysi strategjinë e trajtimit të mbetjeve me landfille të hartuar me paratë e BE-së dhe e zëvendësoi në mënyrë të kundraligjshme me strategjinë e djegësave.
Është personalisht Edi Rama përgjegjës direkt, që imponoi me Agaçin me Metanin kalimin nga strategjia e landfill në strategjinë e djegësave.
Është personalisht Edi Rama dhe askush tjetër nuk mundej që të përfshinte në buxhetin afatmesëm, buxhetimin me 200 mln euro të tre djegësave që mjaftonin për të djegur mbeturinat e gjithë Ballkanit.
Është Edi Rama me Agaçin dhe Metanin ata të cilët mblodhën brenda 24 orësh, 17 firma të të gjitha ministrive që nuk ka ndodhur kurrë në historinë e shtetit shqiptar.
Është Edi Rama me Agaçin dhe Metanin e tij të cilët firmosën për procedurën me negociata të mbyllura, ndërkohë që ajo ishte në kundërshtim flagrant me çdo ligj të vendit.
Gjithçka ne e paraqitëm para jush.
Paraqitëm çdo dokument. Komisioni Hetimor parlament nxorri në dritë të gjitha.
Por Edi Rama për të larë duart si pilati zgjodhi politikën e kokave të turkut.
Pas arrestimit të Lefterit, i cili ishte një hajdut me qira, e merrnin me qira sa herë u duhej për të vjedhur.
Edi Rama zgjodhi për kurban Arben Ahmetaj”, tha Berisha.
Discussion about this post