Kryetari i Partisë Demokratike, Sali Berisha, gjatë konferencës më gazetarët ditën e sotme, akuzoi me tone të ashpra kryeministrin Rama për kapje të shtetit, manipulim të zgjedhjeve dhe degradim të sistemit të drejtësisë. Berisha e cilësoi procesin zgjedhor të 11 majit si “farsën më të shëmtuar të 32 viteve”, duke denoncuar manipulimin masiv të votave të diasporës dhe kapjen e institucioneve kushtetuese.
Lideri opozitar tha se raporti i Komisionit Evropian është një “nekrologji” për shtetin ligjor në Shqipëri. Ai theksoi se drejtësia shqiptare është shndërruar në një sistem të fragmentuar dhe të kontrolluar nga qeveria, ku institucione si Këshilli i Lartë Gjyqësor, Këshilli i Lartë i Prokurorisë dhe Shkolla e Magjistraturës funksionojnë si “korporata” pa koordinim e transparencë, të mbushura me emërime të politizuara dhe me mungesë rregullash bazë. Berisha denoncoi edhe faktin se qindra gjyqtarë janë larguar nga sistemi përmes vetingut pa ndjekje ligjore, ndërsa Inspektori i Lartë i Drejtësisë qëndron pasiv përballë mijëra ankesave.
Gjithashtu, kryedemokrati publikoi dokumente që sipas tij tregojnë se qeveria ka manipuluar votat e diasporës përmes falsifikimit të firmave në zarfet e dërguara me DHL. Ai i cilësoi këto si prova të një krimi elektoral të kryer nga qeveria dhe i drejtoi gishtin Ramës si autor i drejtpërdrejtë i kësaj skeme. “Zarfet nuk u dorëzuan te qytetarët, por u grumbulluan në një qendër dhe u mbushën në mënyrë kriminale për PS-në. Firmat janë vetëm viza, një mashtrim që s’mund të fshihet,” u shpreh Berisha.
Një tjetër akuzë e rëndë ishte ajo për ndërhyrje të qeverisë qendrore në pushtetin vendor, që sipas tij përbën një shkelje flagrante të Kushtetutës dhe Kartës Evropiane të Vetëqeverisjes Lokale. “Ramaduro është vetë kryeministër, vetë kryeprokuror, vetë kryepolic dhe vetë kryetar bashkie,” deklaroi Berisha, duke theksuar se ky përqendrim i pushteteve ka shkatërruar çdo mekanizëm kontrolli dhe llogaridhënieje.
Duke komentuar për reformën territoriale dhe atë zgjedhore, kryetari i PD tha se PD nuk e njeh legjitimitetin e Edi Ramës si kryeministër dhe nuk do të ulet me të apo me qeverinë për asnjë reformë. Megjithatë, ai u shpreh i gatshëm të negociojë me Partinë Socialiste për reformën zgjedhore, duke e njohur PS-në si një forcë politike në sistemin pluralist. “Reforma zgjedhore është përgjegjësi e partive politike dhe ne do të diskutojmë me PS-në si faktor politik, por me qeverinë nuk kemi asnjë punë,” shtoi Berisha ndër të tjera.
Në përfundim të konferencës, Berisha theksoi se fjala e lirë dhe vota e lirë janë themelet e demokracisë, pa të cilat nuk mund të ketë shtet ligjor, liri dhe as drejtësi. Ai bëri thirrje për rezistencë qytetare ndaj regjimit që po i zhyt shqiptarët në një realitet pa shpresë dhe pa drejtësi.
Discussion about this post