Ish-kryeministri, Sali Berisha nuk ka mbetur jashtë debatit për pjesëmarrjen e këngëtarit serb Goran Bregoviç në festën e birrës në Korçë.
Berisha ka postuar në rrjetet sociale një video, ku shfaqet mes shqiptarëve të Kosovës që ishin strehuar në Korçë gjatë luftës. Berisha thotë se po në atë ditë, Bregoviçi këndonte në një koncert në Selanik kundër bombardimeve të NATO-s mbi Serbinë për ta ndalur gjenocidin në Kosovë.
Një përshëndetje të përzemërt miq me këtë video. Në Korcë midis vëllezërve dhe motrave tona nga Kosova ditën që Bregoviçi i Vuçiçit dhe Edvinit protestonte me një koncert në Selanik kundër bombardimit nga NATO të kasapit të tyre Millosheviç! Kurrë më! Sb’- shkruan ai.
Bashkia e Korçës ka vendosur që për Festën e Birrës të ftojë në Shqipëri këngëtarin serb, Goran Bregoviç, ku edhe pas reagimeve të shumta kundër ardhjes së tij, organizatorët kërkuan që të mos përzihej muzika me politikën.
