Kryetari i Partisë Demokratike, Sali Berisha, ka paralajmëruar se opozita do të ndjekë të gjitha rrugët ligjore për të kundërshtuar reformën administrativo-territoriale, të cilën Kuvendi e miratoi me 85 vota.
Gjatë një konference për mediat, Berisha deklaroi se PD do të vijojë përpjekjet për të kundërshtuar shkrirjen e 15 bashkive, vendim që ka shkaktuar edhe protesta të qytetarëve në zonat e prekura.
Ai bëri të ditur se demokratët kanë nisur mbledhjen e firmave për organizimin e një referendumi, ndërsa po shqyrtojnë mundësitë ligjore për zhvillimin e referendumeve në nivel vendor dhe kombëtar.
“Duke dënuar këtë akt, PD deklaron se do të vazhdojë çdo betejë ligjore kundër ekzekutimit të 15 bashkive, dhe për projektin e saj 100 bashki plus. Në këtë kuadër, ne kemi nisur mbledhjen e firmave për referendum. Do të studiojmë të gjitha modalitetet e referendumeve lokale dhe kombëtare, me të cilat kemi bindjen e thellë se mbrojmë interesat e qytetarëve nga një bandë, organizatë kriminale që quhet parlament”, tha Berisha.
I pyetur për hapat e mëtejshëm, kreu i demokratëve nuk përjashtoi as mundësinë që PD t’i drejtohet Gjykatës Kushtetuese për të kundërshtuar ndryshimet territoriale.
Berisha mbrojti qëndrimin e opozitës gjatë diskutimeve parlamentare, duke theksuar se deputetët demokratë paraqitën argumentet e tyre kundër reformës gjatë një debati që, sipas tij, zgjati 14 orë.
“PD nuk përjashton asnjë nga mundësitë ligjore. Ne bëmë avokatinë e qytetarëve të këtyre 15 bashki në një debat ndër më të gjatët dhe intensivë në historinë e parlamentit. 14 orë. Paraqitëm çdo argument, pa asnjë interes partiak, të gjitha në interes të qytetarëve, por u shumëzuan me zero për interesa elektorale të padrinos dhe partisë së tij. Kështu që ne, çdo hapësirë ligjore për të mbrojtur të drejtat e komuniteteve, do ta shfrytëzojnë”, shtoi ai.
Discussion about this post