Ish-kryeministri Sali Berisha ka deklaruar se ka ardhur koha për të zgjuar luanin, që sipas tij janë populli shqiptar.
Në mbledhjen e Këshillit u shpreh rilindasit e Ramës janë hiena dhe se do t’ia mbathin me të katërta sapo të ndjejnë hungërimin e luanit shqiptar.
“Tani nis një fazë e re e aksionit opozitar. Nëse Rama nuk ikën me votë çfarë do të bëjmë?! Do të zgjojmë luanin. Zgjimi i luanit është misioni i kësaj faze të re të aksionit opozitar, kjo do të realizohet vetëm me betejë pa kthim e mosbindje civile. O sot, o kurrë kundër aleancës së qelbësirave, narkoqeveritarëve me në krye Ramën që po u pi gjakun shqiptarëve.
O sot o kurrë të zgjojmë luanin dhe të tregojmë t vërtetën e madhe se populli shqiptar është luani i këtij vendi dhe rilindasit e Ramës janë hiena të tij. Hiena që do t’ia mbathin me të katërta sapo të ndjejnë hungërimin e luanit shqiptar që shumë shpejt do të ngrihet në këmbë”, u shpreh ish-kryeministri.
Lideri demokrat deklaroi se më 27 Dhjetor, Gjykata e Lartë do t’i japë vulën dhe logon e PD-së, Lulzim Bashës, i cili sipas tij ka tradhtuar besimin e popullit opozitar.
Por Berisha paralajmëroi se do ta mbrojë logon dhe vulën dhëmb për dhëmb.
“Më 27 dhjetor Gjykata e Ramës tenton ose vendos t’i japë vulën e PD-së një njeriu i cili tradhtoi për 10 vite me radhë besimin e popullit opozitar. Gjykata e Ramës do t’i japë logon tonë një njeriu lëvozhgë që as kritiku ynë më paranojak nuk e mohon dot se ai është peng i Ramës. Me këtë vendim do të tentojnë të hyjnë në shtëpitë tuaja, në shtëpinë tonë. Do të mbrojmë logon, shtëpinë tonë, dhëmb për dhëmb, pa asnjë hezitim sepse nuk ka shqiptar që nuk e di sot se ajo logo është e jona”, tha Berisha.
Discussion about this post