Në një deklaratë të bërë pas përfundimit të procesit të votimit, Sali Berisha u shpreh se të dhënat operative nga mbarë vendi tregojnë rritje të ndjeshme të elektoratit në zonat tradicionale të qendrës së djathtë, duke shtuar se rezultatet priten të reflektojnë këtë mbështetje të lartë.
Berisha deklaroi se “sovrani foli” dhe tashmë vota ndodhet në duart e komisionerëve, të cilët mbajnë përgjegjësinë për ta numëruar atë në përputhje me ligjin.
Ai ngriti akuza të drejtpërdrejta ndaj grupeve të organizuara në Durrës, që sipas tij janë vënë në lëvizje me urdhër politik nga Edi Rama për të ndikuar në rezultatin e zgjedhjeve.
“Asnjë votë nuk mund dhe nuk duhet të numërohet nën presion. Ligji dhe vetëm ligji,” theksoi Berisha, ndërsa u bëri thirrje komisionerëve të Partisë Demokratike që të mbrojnë procesin.
Ai paralajmëroi se qeveria e Aleancës për Shqipërinë Madhështore, nëse vjen në pushtet, do t’i shpallë grupet që ndërhyjnë në procesin zgjedhor si grupe terroriste, duke premtuar ndëshkim maksimal.
Deklarata e Berishës vjen në një moment kritik për procesin e numërimit të votave, me përplasje politike dhe tension të shtuar në disa zona të vendit.
Discussion about this post