Kryetari i Partisë Demokratike, Sali Berisha, ka dalë sërish në një konferencë për mediat, ku ka intensifikuar retorikën kritike ndaj zgjedhjeve parlamentare të 11 Majit, duke i cilësuar ato si një “farsë elektorale” dhe “masakër zgjedhore” të orkestruar nga qeveria. Gjithashtu, kryedemokrati ka shpallur nisjen e një “lufte” për mbrojtjen e votës. Berisha deklaroi se çdo orë po dalin “fakte dhe dokumente shkatërrimtare” që e vërtetojnë këtë.
Berisha shprehu vlerësimin e tij për komisionerët, numëruesit dhe vëzhguesit e opozitës, të cilët, sipas tij, po kryejnë detyrën “në kushtet e një presioni të gjithëanshëm, në kufijtë e një terrorizmi shtetëror”. Ai i ftoi ata të vazhdojnë punën gjer në fund, duke e cilësuar këtë si mënyrën më të mirë për të mbrojtur votën e shqiptarëve dhe për të “faktuar para shqiptarëve dhe botës, farsën e paprecedentë” të 11 Majit.
Në vlerësimin e tij për raportet paraprake ndërkombëtare, përfshirë misionin e OSBE-ODIHR, Berisha tha se ato “defakto në parimin më themelor ndërkombëtar dhe kombëtar të zgjedhjeve, atë të barazisë së palëve, i kanë rrëzuar përtokë zgjedhjet”. Megjithatë, ai theksoi se problemet ishin edhe më të rënda, duke përmendur sërish kapjen e zgjedhjeve nga “organizata kriminale më të fuqishme të Shqipërisë dhe rajonit”, të cilat, sipas tij, janë bërë “pengmarrës të demokracisë” me ndihmën e Edi Ramës. Ai përsëriti paralajmërimin se këto organizata do të shpallen terroriste nën një qeverisje të PD.
Berisha dënoi me forcë atë që ai e quajti “terror policesk” ndaj numëruesve dhe komisionerëve të PD, duke kërkuar lirimin e menjëhershëm të vëzhguesit Luan Tollozhina, arrestimin e të cilit e cilësoi si “një kurth policesk”. Ai dënoi gjithashtu “aktet e tjera të falangave të krimit” ndaj opozitarëve që kanë dorëzuar dokumente mbi “dhunimin masiv të këtyre zgjedhjeve”.
Kryetari i PD-së theksoi se Partia Demokratike dhe opozita po përgatiten për “luftën e fuqishme për mbrojtjen e të drejtës së votës së shqiptarëve”. Ai shprehu bindjen se “asgjë në botë, asnjë fuqi politike nuk do mund të fshehë të vërtetat e shëmtuara të grabitjes së zgjedhjeve nga narkoregjimi i Tiranës”.
Berisha njoftoi se Partia Demokratike do të paraqesë faktet dhe dokumentet e asaj që ai e quan “farsa elektorale” pranë kancelarive europiane, Senatit, Kongresit dhe administratës së SHBA-së. Ai theksoi se kanë “më shumë se kurrë fakte dhe dokumente” dhe do të kenë “paraqitje dhe shkëmbime intensive mendimesh, dokumentesh dhe faktesh të pakundërshtueshme” me aktorët ndërkombëtarë.
Ai e krahasoi të vërtetën me një diamant që “shndërrim” pavarësisht përpjekjeve për ta nxirë, duke shprehur besimin se opozita do të fitojë si në të kaluarën dhe se nuk ka mision më të shenjtë se “t’i dalim zot të drejtës themelore të shenjtë të qytetarëve shqiptarëve për të votuar të lirë”. Sipas Berishës, “narkoregjimi i Tiranës nuk mundet kurrë të përfitojë për kohë të gjatë nga kjo masakër zgjedhore që kreu”.
Discussion about this post