Berisha: Shqipëria madhështore, qëllimi më madhor i jetës sime në këtë stad

Në takimin me diasporën në Parma, kryedemokrati Sali Berisha tha se Shqipëria madhështore është qëllimi më madhor i jetës së tij.

Ai u shpreh se programi i PD-së e bën Shqipërinë një vend ku jetohet normalisht.

“Ndaj dhe programi ynë, së pari një Shqipëri ku jetohet normalisht. Objektivi i parë, më i rëndësishëm, një Shqipëri ku biznesi ka sukses, ka besim, sjell investime, krijon vende pune, zgjeron aktivitetin. Një Shqipëri me zero tolerancë ndaj mafies dhe krimit të organizuar. Një Shqipëri me zero tolerancë ndaj korrupsionit. Këto janë të domosdoshme, janë themele, por nuk mjaftojnë.

Shqipëria madhështore kërkon që ëndrra e bijave dhe bijve të saj, të ndërtohet në Shqipëri dhe të ndërtohet me të avancuarat që ka koha. Kjo kërkon që Shqipëria të bëhet një epiqendër e rëndësishme e high-tech-ut në rajon dhe më gjerë. Të bëhet Shqipëria e internetit 3, e blockchain, e kriptomonedhave, e inteligjencës artificiale, e datacenter-ave. Kjo është Shqipëria e ëndrrës rinore shqiptare. Kjo do jetë Shqipëria madhështore. Dhe unë u jap fjalën ju, u jap fjalën shqiptarëve se ky është qëllimi më madhor i jetës sime në këtë stad”, tha Berisha.

Ndër të tjera, Berisha ftoi diasporën të regjistrohet për zgjedhje, pasi vota e tyre “ndan epokat”.

“Krye-ora juaj është ora e 11 majit, është dita juaj. Kurrë mos harroni se shqiptarët i lindin për t’i dalë zot Shqipërisë. Kurrë mos harroni himnin tonë kombëtar se nga lufta veçse ai largohet. Dhe ne nuk largohemi kurrë. Rrofshi ju, rroftë Shqipëria. E viva l’Italia. Fitore, fitore, fitore”, tha Berisha.