Deputeti i Partisë Demokratike, Hisen Berisha, komentoi sulmin e terroristëve serbë ndaj policisë së Kosovës, ku mbeti i vrarë Afrim Bunjaku.
Berisha ngriti pikëpyetje mbi mënyrën si është futur gjithë ai armatim që u gjet nga policia në thellësi të territorit të Kosovës.
Ai nënvizoi se është përgjegjësi e KFOR-it që të ruajë ambientin e sigurt dhe të kontrollojë kufirin.
“Si arritën të depërtojnë në terren?! Mirë supozojmë se ka qenë dobësi e policisë së Kosovës dhe ata kanë depërtuar, por shtrohet pyetja si ka mundësi të depërtojë gjithë ajo makineri luftarake, gjithë ai armatim dhe trupa me uniforma në një thellësi kaq të madhe dhe të mos vërhen nga KFOR-i.
KFOR-i e ka detyrim dhe ambientin e sigurt dhe mos depërtimin në kufi. Si ka mundësi që erdhën dhe u vendosën dhe e dislokuan gjithë atë armatim për 100 luftëtarë?! Nuk mund të futet për 2-3 orë brenda nate. Unë kam përvojën time në organizimin e sulmeve dhe në betejën e Koshares për 2 muaj rresht ne kemi dislokuar armatimin në brendësi të territorit, ku kemi planifikuar të zhvillojmë luftën.
Në rrethana paqe, ku kontrollohet gjithçka, aty ku ndodhet KFOR-i me mekanizma të kontrollit tokësor dhe ajror si ka mundësi që u depërtua gjithë ky armatim?!”- tha Berisha.
Discussion about this post