Ish-Kryeministri Sali Berisha e ka cilësuar si blerje të anëtarëve të Kushtetueses nismën e paraqitur nga Qeveria për rritjen e pagave të tyre.
Berisha tha se ajo që ndodhi dje në Parlament ku u tentua të caktohet kryetari i Grupit Parlamentar dhe më pas për të caktuar përfaqësuesit e opozitës në Komisionin e Reformës Zghjedhore ishte një shfaqje e shëmtuar, ndërkohë që Alibasha do votonte që gruaja e tij si anëtare e Kushtetueses të merrte pagë mujore sa 117 pensione.
“Të votosh për rrogën e gruas nuk ka gjë të keqe. Por të votosh për rrogën e gruas, sa 117 pensionistë…
Po do thoni ju, çfarë i mbetet këtij njeriu? Ky është i zhveshur nga çdo lloj brumi njerëzor.
Pa votat e Alibashës, ligji nuk kalonte. Problemi është se po blihen, është pazari i votave për të vendosur një standard që nuk ekziston kurrë në botë. Ata janë 9 vetë.
Nuk është problemi i shumës, por i moralit dhe parimit që shkelmohet në mënyrën më të tmerrshme se ky është akt blerje i Gjykatës Kushtetuese.
Ajo gjykatë ka një rëndësi kapitale për mbrojtjen e kushtetutshmërisë së vendit. Me këtë rrogë, Edi Rama kërkon ta blejë përfundimisht, ta shndërrojë në një noter të mega-aferave të tij.
Dhe kjo është e tmerrshme. Kësaj radhe gjithçka është bërë në zyrën e Don Agaçios dhe Edi Ramës. Asgjë nga parlamenti. Dhe ka ardhur direkt nga zyra e Edi Ramës blerja e noterëve kushtetues dhe kjo është goditje e tmerrshme e sistemit”, tha Berisha.
Discussion about this post