Kryetari i Partisë Demokratike, Sali Berisha, kërkoi nga foltorja e Kuvendit dorëheqjen e kryeministrit Edi Rama, duke e lidhur kërkesën e tij me zhvillimet e fundit në dosjen e AKSHI-t dhe hetimin ndaj ish-drejtueses së SHISH-it, Vlora Hyseni.
SPAK ka vendosur ndaj Hysenit masat “arrest në shtëpi” dhe pezullim nga ushtrimi i funksioneve publike. Ajo dyshohet për përkrahje të autorit të krimit dhe zbulim të akteve sekrete, në lidhje me Ergys Agasin dhe hetimet për çështjen e AKSHI-t.
Gjatë fjalës së tij, Berisha kërkoi që zhvillimet rreth Hysenit të jenë çështja kryesore e debatit parlamentar. Kreu i PD-së pretendoi se rasti ka cenuar sigurinë kombëtare dhe kërkoi zbardhjen e plotë të marrëdhënies mes ish-drejtueses së SHISH-it dhe Agasit.
Kreu i PD-së akuzoi mazhorancën se po përpiqet të minimizojë përmasat e çështjes dhe të shmangë përgjegjësinë politike. Ai kundërshtoi gjithashtu përpjekjet që përgjegjësia për emërimin apo veprimtarinë e Hysenit t’u faturohet zyrtarëve të tjerë, duke argumentuar se drejtuesi i SHISH-it ka marrëdhënie institucionale të drejtpërdrejta me kryeministrin.
Berisha pretendoi më tej se një person i ngarkuar me ruajtjen e sekreteve shtetërore kishte bashkëpunuar me elementë të krimit, ndërsa e cilësoi situatën si një goditje ndaj sigurisë së vendit. Këto janë akuza politike të ngritura prej tij nga foltorja e Kuvendit.
Në përfundim, kreu i opozitës kërkoi që çështja Hyseni-Agasi të jetë në qendër të debatit të seancës së sotme dhe që kryeministri Rama të paraqitet në Kuvend për të dhënë shpjegime dhe për të njoftuar dorëheqjen.
“Ju sot jeni më shumë se kurrë Ergys Agasë, Vlora Hysenë dhe Edi Ramë.
Këta jeni, me asgjë nuk mbroheni ju.
Ju tregoni se nuk keni asnjë interes kombëtar, shoqëror tjetër përveç interesave individuale tuajat.
Si mund të qëndroni ju para këtij akti të pashembullt në historinë e botës?
Çfarë përgjegjësie ndjeni ju ndaj kësaj apo kërkoni ta mbuloni me historinë rozë?
Apo kërkoni ta paraqisni Ramën viktimë të saj?
Apo kërkoni ta mbuloni me partneritetin e shërbimit me shërbime të tjera?
Po të gjitha këto janë historitë më të turpshme për një shtet që është narkoshtet.
A e patë ju apo jo?
Një vend i madh mik kishte planifikuar ta dekoronte me dekoratën më të lartë të veten. Dhe ju e paraqisni sot për avokati dhe jo si një dëshmi e një tradhtie të madhe që Edi Rama me ndihmësen e saj, e ka pasur kryesore.
U përpoq t’ia faturojë Vali Bizhgës. Jo mo zotëri, në asnjë ligj, në asnjë nen, shefi i kabinetit të kryeministrit nuk ka asnjë lidhje në mënyrë kategorike me shefin e shërbimit të vendit.
Shefi i shërbimit të vendit ka vetëm dy lidhje, presidentin dhe kryeministrit.
Por tani që kanë shpërthyer ujërat e zeza tuajat në të katër anët, tani ju… çfarë të përfundoj?
Nuk mund të ketë çështje tjetër përveç kësaj sot, ka rënë siguria kombëtare.
Pse je ti i papërgjegjshëm dhe do ta kapërcesh sikur nuk ka ndodhur gjë, kjo nuk mund të ndodhë.
Shqiptarët kërkojnë autopsinë e plotë, të vërtetën e të gjithë kësaj ngjarje të pashembullt.
Njeriu i paguar për sigurinë e tyre ka bashkëpunuar me kartelet dhe bandat më të rrezikshme të krimit, me autorësinë e Edi Ramës, e Padrinos.
Nuk është një ditë kjo si të tjerat, në 35 vite, asnjë ditë nuk ka pasur si kjo.
Fatos Klosi ka bashkëpunuar me bandat, i ka përdorur ato kundër kundërshtarëve politikë, kurse kjo ishte një ushtare e bandës, një ushtare e shpifur, e turpshme.
Dhe së fundi, thotë e kisha bashkëpunëtor.
Shteti i narkosve nuk shkoi më tutje.
Shiko sa e ulët, sa pa karakter.
Dhe një ditë përpara nxjerr Batonin, i cili u thotë shqiptarëve se ajo, prisni njëherë a ka pasur detyrë apo nuk ka pasur detyrë.
Çfarë jeni kështu mo?
Si mund të jeni kaq antishqiptarë?
Si mund të toleroni një gjë të tillë ju?
Si mund të personifikoni veten tuaj me Vlora Hysenin dhe Ergys Agasin?
Ju jeni skllevër të Padrinos. Po, po.
Jeni skllevër të mëkateve tuaja.
Si mund të silleni në këtë mënyrë sikur nuk ka ndodhur asgjë.
Ndaj sot debati do të jetë vetëm për këtë çështje dhe kreu i juaj të njoftojë dorëheqjen aty ku është dhe të vijë me urgjencë këtu”, tha Berisha.
Discussion about this post