“Berisha s’ka mbështetje në grup parlamentar”, Bardhi: Betejën e tij e ka me SHBA-në

I ftuar në emisionin “Top Story”, deputeti Gazment Bardhi u shpreh se Sali Berisha nuk ka mbështetjen e Grupit Parlamentar të PD. Sipas tij, Berisha në njërën anë thotë se ka besim te vota, në anën tjetër nuk pranon të votëbesojë Enkelejd Alibeajn si Kryetar të Grupit Parlamentar.

“I veti gabim i Alibeajt është që i qëndron stoik vendimeve të tij” – tha Bardhi, duke shtuar se të gjithë ne e dimë se çfarë do të ndodhë me PD në momentin që kjo parti do të drejtohet nga një “non grata”.

Bardhi gjithashtu tha se sot PD është futur në kompleksin e Sali Berishës.

“Zyra e Shtypit e PD shpërndan deklarata kundër Sekretarit amerikan të Shtetit. Unë nuk kam betejë me SHBA, por me Edi Ramën. Sali Berisha ka betejë me SHBA dhe me mua” – tha Bardhi.

Gazment Bardhi gjithashtu është përplasur me Eno Bozdon për zhvillimet në PD. Reagimi i Bozdos erdhi pasi Bardhi tha se Sali Berisha kishte kontaktuar deputetë të PD me qëllim shkarkimin e Enkelejd Alibeajt.

Pjesë nga debati:

Bardhi: Më thuaj vetëm 1 emër, cilin deputet. Nuk jam zëdhënës i askujt

Bozdo: Ne kemi njohur Alibeajn që në fillim si Kryetar i Grupit.

Bardhi: Kush jeni ju more që na thoni njohim Alibeajn? Atë e ka zgjedhur Grupi parlamentar, kush jeni ju, ku merr vesh ti, nuk merrni vesh asgjë. Më thuaj një akt bashkimi që keni ndërmarrë ju.

Bozdo: Gjykata u shpreh dhe dha një vendim që është përfundimtar.

Bardhi: Vendimi nuk është aspak përfundimtar, është i apelueshëm.

Bozdo: Dorëhiquni nga e drejta e ankimit, jepni mesazhin që jeni për bashkim

Bardhit: Pse të tërhiqemi, mos kini frikë nga Gjykatat.