Kryetari i Partisë Demokratike, Sali Berisha, ka reaguar ndaj thirrjeve të protestuesve që kërkojnë burgosjen e tij dhe të Edi Ramës, duke i cilësuar ato si grupe që, sipas tij, financohen nga George Soros.
Berisha tha se demokratët janë vazhdimisht pjesë e protestave si qytetarë dhe mbrojti vendimin që të mos dalin me simbolet e partisë.
Ai kritikoi ashpër sloganet që barazojnë qeverinë me opozitën, duke i cilësuar si klithma dëshpëruese nga opozita e opozitës.
“Demokratët të gjithë janë në protestë. Në këtë protestë qindra dhe mijëra demokratë në mënyrë të vazhdueshme. Mendoj se ka qenë vendimi më i drejtë që ata kanë marrë. Nuk kanë shkuar me simbole të partisë, por si demokratë, si qytetarë.
Sa i përket sloganeve. Ka disa momente. Nuk kanë asnjë lidhje me idealet e vërteta rinore qytetare. Janë slogane, klithma mjerane, të opozitës së opozitës, me të cilat ajo duke e krahasuar Ramën me Sali Berishën, dy të pakrahasueshme në çdo aspekt, kërkon të zbusë pozicionin e Ramës. Kërkon gjithashtu të nxisë qorrsokakun për leverdi të opozitës së opozitës.
Nuk ka vend në botë që të barazojë pozitën me opozitën. Janë dufe dhe mllefe të atyre që hynë në politikë të opozitës. Ndaj dhe u ftoj ju, asnjë impresion nga ato klithma, mbështetje të plotë, pasi ato nuk janë britma që dalin nga idealet e të rinjve shqiptarë, qytetarëve shqiptarë, por dalin nga opozita e opozitës dhe grupe të vogla të armikut të egër të opozitës shqiptare, Xhorxh Soros, që paguan për to”,– tha Berisha.
Discussion about this post