Berisha: SPAK ka marrë të pandehur ish-bashkëshorten e Ahmetajt

Sali Berisha iu rikthye këtë të martë thirrjeve për mosbindje civile.

Gjatë fjalës së mbajtur në protestën poshtë banesës së tij, ish-kryeministri tha se rruga e vetme e shpëtimit është ajo e mosbindjes civile. Berisha u shpreh se “duhet të largojmë të keqen e madhe që ka pushtuar Shqipërinë”, duke iu referuar kryeministrit Edi Rama.

“Rruga e largimit nga pushteti të kësaj qeverie, të këtij njeriu që ka sot të gjitha pushtetet në duart e tij. Edi Rama me Lindën e tij në parlament bllokon heqjen e mandatit të Olta Xhaçkës, kësaj hajduteje të paskrupullt”, tha.

Berisha u ndal edhe të arrestimi i Jorgo Goros. “Si ka mundësi që ish-kryetari i bashkisë Goro burgoset për hotelin e Olta Xhaçkës”, u shpreh ai.

Më tej, foli edhe për çështjen e ish-numrit dy të qeverisë, Arben Ahmetaj. Edhe pse ende nuk ka një konfirmim zyrtar nga SPAK, ai tha se e shoqja e Ahmetajt u mor e pandehur si hakmarrje për akuzat që ish-zv/kryeministri lëshoi ndaj Edi Ramës. Berisha tha se ajo u mor e pandehur “me pretekstin se Mirel Mërtiri, apo nuk mbaj mend cili prej tyre, i paska paguar pllakat e kuzhinës dhe të banjos”.

Ish-bashkëshortja e Ahmetajt u thirr më herët gjatë ditë në SPAK. Në dalje, ajo nuk preferoi të japë asnjë deklaratë për gazetarët.