Ish-kryeministri Sali Berisha sulmoi ashpër ambasadoren amerikane në Tiranë, Yuri Kim duke deklaruar se po sillet në Shqipëri si guvernatore, “njëlloj si dikur ambasadori Sovjetik“.
Nga stadiumi “Air Albania”, ish-kryeministri e cilësoi si mjerane dhe brutale ndërhyrjen e Yuri Kim në Shqipëri, ndërsa e konsideroi si të dhimbshme sjelljen e saj.
“Kundër nesh peng-kryetari me të gjithë mbështetjen e qeverisë, por mjerisht ne u përballëm me një ndërhyrje të pashembullt, brutale të diplomatëve dhe zyrtarëve nga një vend mik, SHBA-ja. Me këtë rast unë dua të theksoj dhe t’u them këtyre zyrtarëve se ne jemi një komb i vjetër, në historinë tonë pakkush më shumë se ne ka pasur të bëjë me superfuqitë e kohërave nga lashtësia deri sot. Bashkimi Sovjetik ashtu sikur e cilësoi Presidenti amerikan Regan, ishte perandoria e së keqes, e degradimit të njeriut, e mjerimit, e dhunës, terrorit. E kundërta e tij janë SHBA-të. Perandoria e lirisë, e vlerave. Vendi i madhi lirisë ka bërë për lirinë e shqiptarëve më shumë se çdo vend tjetër në botë. Por vendi i madh ka bërë për lirinë e botës gjithashtu më shumë se kushdo. Është e dhimbshme të shohësh ambasadoren e SHBA-së të sillet si guvernatore, njëlloj si dikur ambasadori Sovjetik në Tiranë. Perandoritë ndryshojnë si nata me ditën, por burokratët dhe njerëzit e harrojnë këtë” tha ai.
Ambasadorja Yuri Kim ka shprehur hapur qëndrimin e saj kundër Berishës, ndërsa herë pas herë i ka bërë thirrje dhe delegatëve të mos i bashkohen Kuvendit të sotëm, pasi nëse Berisha rikthehet në PD, nuk do të kenë mbështetje nga SHBA.
Discussion about this post