Kreu i Partisë Demokratike, Sali Berisha, ka akuzuar mazhorancën për dhunë ndaj qytetarëve që po protestojnë jashtë Kuvendit kundër reformës territoriale. Nga foltorja e Parlamentit, ai kërkoi ndërprerjen e ndërhyrjeve të policisë dhe dëgjimin e kërkesave të protestuesve.
Gjatë fjalës së tij në seancën plenare, ku pritet të votohet reforma territoriale, Berisha e cilësoi Kuvendin si një “parzmore të dhunës”, duke pretenduar se forcat e rendit po ushtrojnë dhunë ndaj qytetarëve të mbledhur nga zona të ndryshme të vendit.
Kryedemokrati kërkoi që përfaqësuesit e protestuesve të lejohen të paraqesin shqetësimet e tyre në Parlament, duke theksuar se kundërshtimi ndaj reformës territoriale shkon përtej përkatësive politike.
“Parlamenti, një dhunë dhe terror i paparë ka shpërthyer ndaj qytetarëve që sot protestojnë në mbrojtjen e Kushtetës së vendit. Një dhunë e paparë ka shpërthyer ndaj të rinjve, burrave dhe grave të mbledhur nga e gjithë Shqipëria. Kërkoj stop dhunës ndaj protestuesve, kërkoj që të pranohen dhe të dëgjohen në Parlament. Janë përfaqësues nga të gjitha partitë”, deklaroi Berisha.
Më tej, kreu i opozitës vijoi me akuza ndaj mazhorancës, duke përmendur kryeministrin Edi Rama dhe deputeten socialiste Olta Xhaçka.
Berisha ngriti pretendime për lidhje me persona të përfshirë në veprimtari kriminale, ndërsa iu referua edhe SPAK-ut, pa paraqitur gjatë fjalës së cituar prova për këto akuza.
Në përfundim, ai paralajmëroi mazhorancën se, sipas tij, përdorimi i forcës ndaj protestuesve nuk do të ndalë kundërshtimin e opozitës ndaj reformës territoriale.
“E kuptoni se çfarë ndodh, ka 54 udhëtime të regjistruara me Begon e etij. A mund të kishte një vend në botë që mbante në Parlament shoqëruesin e një super trafikanti që i mori mbiemrin trafikantit. Ajo çoi burrin në SPAK sot…Olta. Jeni marrë, çdo ministër me kontrabandë, edhe vetë Olta. Ju garantoj që fatin e Edi Ramës do kesh, të ka marrë si letër të fundit…Këtij Demos ia kam fjalën dhe mendon se dhunë do t’i ndalë. Çfarëdo që të bëni nuk do të shpëtoni, jeni të marrë fund”, tha Berisha.
Discussion about this post