Kreu i opozitës Sali Berisha shprehet se zgjedhjet në Himarë që nxorën fitues kandidatin e socialistëve Vangjel Tavo, u braktisën.
“Edivin Gjipea pasi rrëmbeu me dhunë terror burgim politik mandatin e Fredi Belerit në Himarë kreu dje grabitjen e tyre të mandatit me kukullën e tij Vangjel Tavo”, shkruan Berisha në një postim në rrjetet sociale.
Më tej, ai rendit edhe makinacionet, që sipas tij, janë përdorur nga pushteti për manipulimin e zgjedhjeve.
“Ai në këtë grabitje mobilizoi në shkelje të ligjeve dhe kushtetutës të gjithë potencialin e shtetit kriminal elektoral dhe institucionet e tij, ju mohoi të drejtën kushtetuese të votës 6153 qytetarëve të Himarës me motivin e skadimit të afatit të kartave të identitetit ndërkohë që në maj të vitit 2023 me vendim të veçantë i kishte lejuar të votonin”, shkruan Berisha.
“Me qëllim grabitjen e mandatit, Edvin Gjipea solli në listat e votimit në Himarë 360 votues nga Dropulli, Saranda dhe Tirana dhe qindra të tjerëve iu ndryshoi qendrat e votimit. Të gjitha këto ndërhyrje të shtetit kriminal elektoral, manipulime me listat e zgjedhësve dhe përjashtimi i 6153 qytetarëve nga votimi dëshmojnë se mandati i Tavos qëndron mbi krimin monstruoz elektoral”, shton.
“Me Edi Ramen nuk ka zgjedhje. O sot o kurrë”, përfundon reagimi i kryedemokratit.
Zgjedhjet në Himarë u mbajtën të dielën, ndërsa fitues rezultoi Vangjel Tavo, me një diferencë prej më shumë se 1470 votash kundrejt kandidatit të opozitës Petro Gjikuria. Tavo, pas numërimit dhe të kutisë së fundit arriti të mbledhë 5022 vota, kundrejt 3545 që mori rivali i tij i koalicionit Bashkë Fitojmë, Petro Gjikuria.
Discussion about this post