Berishës i hoqën imunitetin, reagon Bardhi: Akt i mirëfilltë politik

Kryetari i Grupit Parlamentar të PD-së, Gazment Bardhi, ka reaguar për votimin e sotëm në Kuvend për heqjen e imunitetit të deputetit Sali Berisha.

Bardhi e ka quajtur një vendim antikushtetues votimin e sotëm në Kuvend.

“Vendimi antikushtetues i Kuvendit ndaj Sali Berishës, miratuar vetëm me votat e Edi Ramës pa arsyetim dhe prova, është akt i mirëfilltë politik. Shpërfillja e Kushtetutës dhe ligjit në rastin konkret, është standardi më i keq i vendosur në një shoqëri demokratike.

Cilido duhet të jetë i barabartë përpara ligjit, por barazia duhet të ekzistojë edhe në të drejta. Një standard për bashkëpunëtorët e Edi Ramës dhe një tjetër standard tërësisht i ndryshëm për kundërshtarët e Edi Ramës, nuk është as barazi dhe as drejtësi”, shprehet Bardhi.

Kuvendi i ka hequr sot imunitetin deputetit Sali Berisha, për të cilin SPAK ka kërkuar një masë më të fortë, atë të arrestit me burg apo arrest shtëpie.

Me 75 vota pro Kuvendi ka miratuar në një situatë të pazakontë, teksa opozita protestonte në sallë, por dhe jashtë Kuvendit.