Besimtarët myslimanë në të gjithë Shqipërinë iu drejtuan xhamive të qyteteve mëngjesin e sotëm për faljen e Kurban Bajramit. Udhëheqësit fetarë apeluan për më shumë mirëkuptim, ndihmë ndaj njerëzve në nevojë dhe forcim të vlerave familjare e shpirtërore.
Në Vlorë besimtarët mysliman u mblodhën në pallatin e sportit “Flamurtari” për të falur namazin e Kurban Bajramit. Përveç besimtarëve të Vlorës, ka pasur dhe prezencë të besimtarëve me kombësi të huaj. Falja e Namazit të Kurban Bajramit u drejtua nga Myftiu i Vlorës, Ardit Hoxhllaku.
Në orët e para të mëngjesit, edhe besimtarët në Durrës iu drejtuan Xhamisë së Madhe në qendër të qytetit, për faljen e namazit dhe ndarjen e këtij gëzimi me njëri-tjetrin.
Gjatë ligjëratës së imamëve u theksua se mesazhi i Kurban Bajramit përçon filozofinë e sakrificës si kusht jetik për mbarëvajtjen dhe ngritjen e një shoqërie.
Ashtu si individi duhet të sakrifikojë nga koha, gjumi dhe të ardhurat e tij për të ofruar më të mirën, ashtu edhe institucionet duhet të bëjnë të njëjtën gjë në shërbim të qytetarëve, si rruga e vetme për të arritur një standard të lartë ndërgjegjeje dhe normash morale që garantojnë përparimin dhe harmoninë kolektive.
Pas faljes, besimtarët shkëmbyen urimet e rastit me njëri-tjetrin dhe u shpërndanë për të vijuar festën dhe për të përcjellë mesazhin e saj te familjet dhe të afërmit e tyre.
Edhe në Sarandë qindra besimtarë myslimanë iu drejtuan xhamisë xhaminë për të falur namazin e Kurban Bajramit. Atmosfera u karakterizua nga qetësia, besimi dhe urimet mes familjarëve e qytetarëve që morën pjesë në ceremoninë fetare.
Për shkak se Myftiu i Sarandës, Bledar Mullai, ndodhet në Mekë për kryerjen e ritualit të Haxhit, falja e namazit u drejtua nga Banart Pajollari. Në fjalën e tij para besimtarëve, ai përcolli mesazhe paqeje, harmonie, mirëkuptimi dhe vëllazërie mes njerëzve, duke theksuar rëndësinë e solidaritetit dhe respektit reciprok në shoqëri.
Në Shkodër përpara faljes së namazit, ku ishin mbledhur qindra besimtarë, Myftiu Muhamed Sytari në këtë ditë të sakrificës dhe përkushtimit ndaj tjetrit u bëri thirrje qytetarëve të qëndrojnë pranë familjeve të tyre dhe të pamundurve, duke e cilësuar emigrimin si plagë të shoqërisë sonë. Besimtarët në Elbasan u mblodhën për të falur namazin në e Kurban Bajramit përpara sheshit të Kalasë, kurse Hytbja e rastit u mbajt nga Myftiu i Elbasanit Agim Duka.
Në Fier namazin e Kurban Bajramit besimtarët e falën në sheshin e qytetit, ndërsa falja u drejtua nga Myftiu i Fierit, Mikel Hazizolli. Myftiu i Lushnjës, Gramoz Blliku drejtoi lutje për paqe.
Discussion about this post