Besion Ajazi kujtohet në mes të procesit mësimor që të rikonstruktojë shkollat. Po kush e ka mendjet tek nxënësit?! Kryetari i Bashkisë Gramsh u është futur me kokë tenderave! Me një prokurim plot shkelje, Ajazi i kthehet pas 15 vitesh shkollës 9-vjecare ‘Rilindja’. Më datë 29 korrik 2024, Ajazi ka zhvilluar tenderin me objekt “Rikonstruksioni i Shkollës 9-vjeçare ”Rilindja” Bashkia Gramsh’ me fond limit 925 milionë lekë. Në fakt, kur të shtohet vlera e TVSH, kontrata pritet të kalojë mbi 1 milion euro.
Siç duket në dokumentin më poshtë, Open Data Albania i vendosur “Flamurin e kuq” tenderit, si shenjë e riskut të korrupsionit.
Kontrata duket se ka qenë e paracaktuar për biznesmenin Florjan Muha. Për 18 ditë që ishte e hapur gara, u dorëzuan oferta nga 5 operatorë.
Veçojmë bashkimin e operatorëve ‘’BEQIRI” SHPK & “C O L O M B O” SHPK që kishin një nga ofertat më të lira me vlerë 765 milionë lekë për kryerjen e riparimeve. Gjithashtu edhe firma “ ASI-2A CO” sh.p.k propozoi vlerën 758 milionë lekë. Por të dyja këto u përjashtuan nga gara, pasi kishin gabime në dokumente ose mangësi në dosjen e dorëzuar online.
Ishin ofertat më të mira dhe u larguan menjëherë pa iu dhënë e drejta të rregullojnë dokumentet që u mungonin. Fill pas tyre janë skualifikuar edhe dy kompani të tjera, që kishin oferta të njëjta me fituesin dhe kështu e kuptueshme që pa garë fare (pasi nuk kishte më konkurrent në fazën finalë) kontrata iu dha firmës Inerti SHPK, në pronësi të Florjan dhe Halil Muhës.
Denoncimi i KLSH
Nga ana tjetër kjo është një kompani që nuk jep garanci se do të kryejë punimet me cilësi dhe në afat. Kontrolli i Lartë i Shtetit në një raport auditimi të veprimtarisë së Bashkisë Elbasan për vitin 2022 ka konstatuar vjedhjen që ka bërë kompania e Muhës me punimet e riparimit të rrjetit të kanalizimeve. KLSH zbuloi mashtrimin me volumin e punimeve, duke i shkaktuar dëm buxhetit të shtetit.
Në 29 dhjetor të vitit 2021, Irland Sina, në atë kohë nënkryetar i Bashkisë Elbasan, shpalli fituese kompaninë Inerti shpk të tenderit me objekt ‘Rikonstruksion dhe ndërhyrje në linjën KUZ dhe ndërtim i sheshit të parkimit të Varrezave Publike’. Shuma e vjedhur është një bakshish në raport me abuzimet e mëdha që janë kryer në këtë tender, por tregon se sa e pamëshirshme është kjo çetë abuzuesish që përlajnë paratë publike edhe kur ato janë për varrezat.
Punime gjatë porcesit mësimor
Ndërsa në rastin tonë, Florjan Muhos i lihet në dorë një institucion i rëndësishëm, një shkollë. Aq më tepër që kjo godinë ka nevojë për një rikonstruksion pa hile, pasi sipas të dhënave të dokumentit shkolla është ndërtuar që në vitin 1966.
Në vitin 2019, Bashkia e Gramshit ka bërë një rikonstruktim të pjesshëm të shkollës, pra suvatime dhe lyerje. Por prej vitesh nxënësit mësonin në kushte skandaloze, me çati të dëmtuar dhe dysheme të amortizuar, fakt që specifikohet në dokumente. Gjithashtu, siç thamë pak më lartë në këto vite ka fjetur gjumë bashkia, tani që ka nisur edhe mësimi kujtohet të ndërhyjë në godinë, çka do të sjellë zvarritje dhe mësim me dy turne për nxënësit që mësojnë aty!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post