Ceremonia e ndarjes së çmimeve muzikore “BET Awards” që do të zhvillohet sonte në orët e vona të mbrëmjes, do të përcillet me performancat e artistëve të famshëm si: Megan Thee Stallion, Lil Nas X dhe H.E.R., në nderim të reperit të ndjerë, DMX dhe po ashtu në nderim të karrierës së Queen Latifahs.
Taraji P. Henson,do të jetë nikoqir i mbrëmjes së madhe e cila do të zhvillohet në Teatrit Microsoft, në Los Anxhelos, ku në mesin e atyre që do të performojnë në skenë do të jenë edhe DaBaby, DJ Khaled, Jazmine Sullivan, Migos, Lil Baby, Andra Day, Roddy Ricch etj.
Reperi Swizz Beatz, njëherësh bashkëshorti i këngëtares Alicia Keys, ka përgatitur një performancë po ashtu në nderim të DMX i cili ka vdekur në prill të këtij viti, në moshën 50-vjeçare, si pasojë e mbi-dozës. Për nderim të DMX-it do të këndojnë edhe Busta Rhymes e Method Man.
Ndërkohë, aktorja e famshme, Queen Latifah do të nderohet këtë vit me çmimin për “Arritje Jetësore”.
Në krye të nominimeve këtë vit, qëndrojnë reperet Megan Thee Stallion dhe DaBaby, secila me nga shtatë nominime.
Drake dhe Cardi B janë artistët e dytë me më shumë nominime, secili me nga pesë sosh, ndërkaq Chris Brown e Bruno Marsi, sivjet janë nominuar në nga katër kategori secili.
Në mesin e të nominuarve është edhe The Weeknd i cili sivjet është nominuar në dy kategori.
Këtë vit, do të lejohen të marrin pjesë si audiencë, të gjithë ata që tashmë janë vaksinuar. Ndërkaq, derisa numri i gazetarëve që do ta përcjellin sivjet këtë ngjarje do të jetë i kufizuar, “BET” planifikon që të ketë tepihun e kuq para ngjarjes ku do të parakalojnë shumë fytyra të famshme.
