Dje u zhvillua mbledhja e grupit parlamentar të deputetëve të opozitës, drejtuar nga Gazment Bardhi. Sikurse mësohet ajo është shoqëruar edhe me debate lidhur me qëndrimin që duhet të mbajë opozita, pas vendimeve më të fundit të mazhorancës socialiste për të ndëshkuar shumë më ashpër, deri ne dy muaj përjashtim, deputetët demokratë për veprimet e tyre kundërshtuese dhe bllokuese në seancat plenare apo edhe komisionet parlamentare. Qëndrime të kundërta ka patur mes kreut të opozitës, Sali Berisha dhe kreut të grupit parlamentar, Gazment Bardhi.
Ish-kryeministri Berisha ka kërkuar në mbledhjen e djeshme të grupit parlamentar, që dita e seancës plenare, e kësaj te enjteje, të jetë ditë proteste. Sipas tij, duhet arritur një pikë kulmore e aksionit opozitar, duke thirrur mbështetësit e opozitës përpara parlamentit.
Për ish-kryeministrin kjo do të duhet të bëhet për shkak se Partia Socialiste ka lajmëruar votimin e ndryshimeve pa konsensusin e opozitës të rregullores së Parlamentit, ku tashmë deputetët e opozitës, mund të përjashtohen deri në 2 muaj.
Por kjo ide e Berishës, është kundërshtuar nga Gazment Bardhi, i cili, sipas burimeve, ka deklaruar se nuk ka arritur ende koha për të thirrur qytetarët në protestë, pasi do të duhet ende që këtë betejë ta përballojnë deputetët, dhe se është thënë publikisht se deputetet duhet të sakrifikojnë për të drejtat e tyre të shkelura kushtetuese. “Çdo protestë qytetare në këtë moment do të keqinterpretohet nga opinioni publik dhe se nuk mund të konfondohen betejat e opozitës me akte momentale. Strategjia e opozitës nuk duhet të ndikohet nga ngjarje rastësore”, mësohet të jetë shprehur Bardhi.
Surprizë ka qenë edhe reagimi i një ndër deputetëve më mbështetës të Sali Berishës, që prej nisjes së aksionit të tij të Foltores, Flamur Noka, i cili ka dalë në krah të Gazment Bardhit, duke argumentuar, se një protestë e tillë, nuk mund të zhvillohet në këtë moment. “Kemi deklaruar që betejën do ta përballojnë fillimisht deputetët, përpara se t’i kërkojmë sakrificë mbështetësve”, mësohet të jetë shprehur ai.
Pas një diskutimi të gjatë deputetët e opozitës randë dakord që të enjten të mos ketë protestë, por të vijohet me aksionin opozitar brenda ambienteve të Kuvendit të Shqipërisë.
Discussion about this post