Kolegji i Gjykatës Kushtetuese do të mblidhet këtë të martë, 2 dhjetor për të vendosur nëse kërkesa e qeverisë për të shqyrtuar pezullimin nga detyra të zëvendëskryeministres dhe ministres së Infrastrukturës dhe Energjisë, Belinda Balluku, do të pranohet për shqyrtim.
Treshja e gjyqtarëve do të vlerësojnë nëse kërkesa plotëson kriteret procedurale dhe kushtetuese për t’u trajtuar nga trupa gjyqësore.
‘Me kërkesë të gjyqtares Marsida Xhaferllari, e cila kishte marrë njoftim për aktet pasditen e datës 26.11.2025 dhe në përputhje me nenin 24 të Rregullores për Procedurat Gjyqësore, i cili parashikon se gjyqtarët duhet të kenë në dispozicion kërkesën dhe aktet e kërkesës të paktën dy ditë përpara mbledhjes së Kolegjit, u caktua që shqyrtimi i çështjes do të bëhet nga Kolegji ditën e parë të punës, pas festave zyrtare të nëntorit, konkretisht në datën 02.12.2025. Vendimmarrja e Kolegjit do të njoftohet rregullisht në faqen zyrtare të Gjykatës Kushtetuese’, thuhet në njoftimin e Gjykatës Kushtetuese.
Numri dy i qeverisë, Belinda Balluku, njëherësh Ministre e Infrastrukturës dhe Energjisë është pezulluar nga Gjykata e Posaçme Kundër Korrupsionit dhe Krimit të Organizuar (GJKKO), ndërsa qeveria ka ankimuar vendimin në Kushtetuese, duke argumentuar se pezullimi përbën ndërhyrje në pushtetin ekzekutiv.
Një ditë para (1 dhjetor) se Gjykata Kushtetuese të marrë vendimin nëse do të pranojë ose jo kalimin për shqyrtim në seancë të ankimimit shefi i qeverisë u dërgoi anëtarëve të kësaj gjykate një tjetër mesazh paralajmërues.
Komentet për procesin në Gjykatën Kushtetuese, Kryeministri i paraqet si detyrim ndaj atyre që e kanë votuar, edhe pse prej një muaji nuk ka zbatuar detyrimin për të sqaruar opinionin publik mbi qëndrimin e tij lidhur me aferën prej 190 milionë eurosh të tunelit të Llogarasë.
Discussion about this post