Ish-sekretari i Përgjithshëm i PD, Arben Ristani është shprehur i sigurt nga Korça se Kuvendi i 11 dhjetorit i thirrur nga Sali Berisha do të mblidhet për të ndryshuar statutin e PD, duke nënkuptuar largimin e kreut aktual Lulzim Basha.
“Tashmë është e sigurt që në datën 11 kuvendi i PD i thirrur nga mbi 1/4 e anëtarëve do të mblidhet për të ndryshuar statutin e PD, për të shqyrtuar veprimtarinë anti statutore të kryetarit të PD dhe për të rifutur në statutin e PD dispozita të cilat do të bëjnë të mundur mbajtjen e referendumeve në PD. Është dorëzuar para disa kohësh siç jeni në dijeni, mbi 4200 firma të anëtarëve të kuvendit të PD, firmat janë në masë të mbledhura nga anëtarët e kuvendit, sigurisht me vullnetin e plotë të tyre”, tha Ristani.
Sipas ish-deputetit, beteja nuk është midis Berishës dhe Bashës, por midis këtij të fundit dhe anëtarëve të PD.
“Që në fillim të kësaj lëvizje kurrë nuk kemi pasur një problematikë midis Berishës dhe Bashës. Është një problematikë dhe një konflikt midis anëtarëve të PD dhe kryetarit i cili shkel statutin në mënyrë të vazhdueshme. Konflikti nuk është midis Bashës dhe Berishës dhe nuk mund të zgjidhet midis tyre, ai është mes anëtarëve të PD dhe kryetarit Basha. Kryetari i cili e përsëris edhe një herë e ka çuar partinë nga një humbje, në një tjetër”, është shprehur ai.
Ristani shkruan ndër të tjera, se kuvendi i 18 dhjetorit i thirrur nga Basha nuk do të mbahet pasi shumica e delegatëve do të jenë prezentë në atë të 11 dhjetorit.
Discussion about this post