Teksa në selinë blu beteja Basha-Berisha vijon, Partia Demokratike po përjeton një nga situatat me kritike të saj, pasi është “ndarë” në dy fronte. Deri në përfundim të kësaj situate, reagimet nga politikanë dhe përfaqësues të këtyre dy “fronteve” do të jenë prezente. Ish-deputet i Partisë Demokratike në Kuvendin e Shqipërisë, Astrit Patozi, e komenton lëvizjen aktuale të Berishës, atë të Foltores, si një betejë personale, më shumë se sa një ringritje të PD.
“Berisha e ka betejë personale, ajo ka lindur si lëvizje me 9 shtator, kur Basha vendosi ta pezullojë.
Berisha është në të drejtën e vetë të vazhdojë të bëjë karrierën e tij politike por të heqë dorë nga analiza e Bashës në këto 8 vite, se ai ka qenë tutori i tij në aksionet politike”, tha Patozi
Patozi tha më tej se qëllimi i Berishës, me takimet nëpër qytete është të “ripushtojë PD, ta marrë atë me letra dhe ta zbojë Bashën”. Pasi sipas tij Berisha është themeluesi i kësaj partie.
“Berisha u drejtohet njerëzve që drejtohen nga emocionet, ai është një populist rrace. Ne duhet të qartësojmë një gjë, që Berisha dhe Basha kërkojnë të kenë monopolin e PD, por interesat i kanë të ndryshme, megjithëse thonë se i kanë të njëjta. Kurse halli i Bashës është të shpëtojë nga Berisha.Kurse Berisha nuk ka për qëllim të shpëtojë nga Lulzim Basha, por ta ripushtojë PD, ta marrë me letra dhe ta zbojë Bashën. Sepse Berisha nuk mund të pranojë që nga PD ta zbojë dikush tjetër, përbindësi që e ka rritur vetë”, është shprehur ai.
Sipas tij problemi më i madh në këtë betejë është se Berisha e përdor Bashën si një lloj korrace për të mos dalë përballë SHBA, duke fshehur kështu betejën reale.
“Se Berisha mund të marrë dhe 99.9 përqind mbështetjen po s’ka letra të në rregull, certifikimin, pra. Pra Berisha ka dy rrugë, ose gjykatë që nuk e beson, plus dhe është e shëmtuar të shkosh se kjo është çështje politike”, tha Patozi.
Patozi mendon se ndarja e PD është zgjidhja më e mirë, duke komentuar se sipas tijndarja e PD e rrit mundësinë një kompromisi të mundshëm , kurse kacafytja e brendshme sipas tij, vetëm e shkatërron.
Discussion about this post