Çdo ditë e më shumë qyteti i Tiranës betonizohet nga ndërtimet që bëhen vend e pa vend me lejen e kryebashkiakut, Erion Veliaj. Gjatë fushatës elektorale, Veliaj premtoi se nuk do jepte më leje ndërtimi në hapësira publike të gjelbëruara, por faktet tregojnë që ky mbeti vetëm një premtim. Përveç pallateve gjigande në qendër të qytetit, në këto ditë ai ka dhënë lejë të priten pemët tek Liqeni Artificial, për t’i hapur vendin një tjetër përbindëshi betonizimi.
Prej disa ditësh, brenda ambienteve kur dikur ndodhej Garda ka filluar të ndërtohet një pallat, ndërsa pemët rreth e rrotull janë prerë. Edhe pse Parku i Liqenit Artificial konsiderohet si mushkëria e kryeqytetit, askush nuk po shqetësohet për shkatërrimin e zonës duke e zhveshur nga pemët. Kjo tregon se, fotot që hedh Veliaj çdo ditë duke mbjellë pemë dhe deklaratat e tij se do të gjelbërojë qytetin janë pjesë e propagandës, për të mbuluar masakrën që po i bën ai në të vërtet Tiranës.
Sipas të dhënave, godina, e cila tashmë ka filluar të ndërtohet, do të jetë me funksion hotel me zyra dhe shërbime 14 kate mbi tokë dhe 3 kate nëntokë.
Objekti i është dhënë shoqërisë së “Ferro Beton and Construction Co shpk” me përfaqësues Enea Mitrushi.
