Sipërfaqja e lejeve të ndërtimit është shtuar në Tiranë gjatë tremujorit të parë, ndërsa ka rënë në rang kombëtar, krahasuar me një vit më parë.
Të dhënat e INSTAT bëjnë të ditur se si sipërfaqja e lejeve të ndërtimit në kryeqytet, ashtu dhe numri i tyre, kanë shënuar rritje në tre muajt e parë të vitit. Sipas shifrave të raportuara nga INSTAT, për periudhën janar- mars 2024 janë dhënë gjithsej 109 leje ndërtimi me një sipërfaqe prej 232 mijë metra katror, me një rritje prej 16% në krahasim me të njëjtën periudhë të një viti më parë, kur sipërfaqja e lejeve zbriti poshtë 200 mijë metra katror për herë të parë që nga viti 2018 dhe u dhanë 79 leje ndërtimi.
Po sipas INSTAT, vlera e përafërt e lejeve të ndërtimit miratuar për ndërtesa dhe punime inxhinierike në tremujorin e parë në kryeqytet ishte 9.1 miliardë lekë, ose rreth 90 milionë euro, me rritje prej 39% në krahasim me të njëjtën periudhë të një viti më parë.
Ndryshe nga Tirana, në rang kombëtar u dhanë më pak leje.
Sipas INSTAT, në tremujorin e parë 2024 janë miratuar gjithsej 311 leje ndërtimi për ndërtesa të reja, nga 429 leje të miratuara në tremujorin e parë 2023, duke shënuar një ulje prej 27,5 %.
Sipërfaqja e lejeve të ndërtimit miratuar për ndërtesa të reja, në tremujorin e parë 2024 është 357.585 m2, nga 415.842 m2 miratuar në tremujorin e parë 2023, duke shënuar një ulje prej 14,0 %.
Në tremujorin e parë 2024, vlera e përafërt e lejeve të ndërtimit miratuar për ndërtesa dhe punime inxhinierike është 13,6 miliardë lekë, nga 21 miliardë lekë miratuar në tremujorin e parë 2023, duke shënuar një ulje prej 35,0%.
Discussion about this post