Anëtari i Këshillit Kombëtar të Berishës, Aleksandër Biberaj, në një intervistë për News 24 u shpreh se në zgjedhjet e 14 majit beson se kandidatët e dalë nga Primaret do të marrin rezultate fituese në bashkitë e vendit.
Sa i përket kandidatëve të Enkelejd Alibeajt, ai tha se nuk kanë shanse që të fitojnë, por uron që të mos dëmtojnë kandidatët e koalicionit “Bashkë Fitojmë”, duke u ndarë votat.
Sakaq, Biberaj tha se nëse në këto zgjedhje nuk do të dalin fitimtar, atëherë në PD është nevoja për reformim të thellë, dhe se gjithsecili duhet të marrë përgjegjësitë, duke nisur nga Sali Berisha.
“Në 14 maj, asnjë prej tyre, të Alibeajt, s’ka shans të fitojnë, por uroj të mos na dëmtojnë ne. Rolandi ka zgjedhur vetë të jetë në atë vend, por mbështetja do jetë për Këlliçin. Durrësin dhe Elbasanin e shoh fitues, Tiranën e shoh me shanse për të fituar.
Uroj të mos na dëmtojnë duke na marrë votat tona, të demokratëve dhe asaj pjesë që brenda PD kanë pakënaqësi nga Berishës. Nëse humbim, përgjegjësia do jetë e të gjithëve, më shumë e kandidatëve që e kanë marrë përsipër, s’kemi kohë për eksperimente apo për selfie.
Dëmi na bëhet ne si komb, dhe ne si demokratë sepse ka 10 vite që jemi jashtë pushtetit. Nëse ne nuk fitojmë, kemi nevojë për një reformim të thellë, sepse vijnë zgjedhjet e tjera për dy vite dhe nuk është se kemi shumë kohë. Secili të marrë përgjegjësitë e veta, nga Berisha deri tek i fundit.
Ne kemi më të vërtetë kandidatë të mirë, që janë figura të pastra dhe jo të konsumuara, sepse shpesh me këto xhaketat që kthehen 100 herë është problem”, tha ai./BW/
Discussion about this post