Nga Beti Njuma
Është e udhës të hapen herë pas here arkivat për të parë thesin e shqyer të premtim-mashtrimeve. Në 20 dhjetor 2015, me rastin e 95 vjetorit të Bibliotekës Kombëtare kryeministri Edi Rama deklaroi:
“Ne do të bëjmë për Bibliotekën Kombëtare sa nuk është bërë për 25 vite të marra së bashku. Ne jemi plotësisht të angazhuar në këtë proces dhe do t’ia rikthejmë Bibliotekës pjesën e trupit të saj të amputuar nga barbaria e kulturës së tranzicionit.”
11 vjet në pushtet, 11 vjet Kryeministër, miliona euro për PPP dhe Koncesione, dhe Shqipëria s’ka më as Bibliotekë e as Teatër Kombëtar, as Muze e as Galeri Kombëtare! Njërën e shkatërroi, tjetrën kurrë s’e ndërtoi, dy të fundit i la në rikonstruksion të përjetshëm!
Fundja ç’na duhen! Kemi COD-in në kryeministri ku bëhen promovime librash, ekspozita, gjithfarë takimesh e shumë shpejt edhe shëtitje botanike! Tani Kryeministria nuk shërben më as për mbledhje qeverie se ato bëhen nëpër rezorte private poshtë e përpjetë nëpër Shqipëri!
Kurrë “Kombëtarja” nuk ka pasur më pak vlerë se sot duke i lënë shqiptarët në injorancë e mjerim të shohin vetëm podcastet e Ramës online.
P.S Aq e mjerë është Shqipëria sot sa jam e bindur që qindra miq që kam në Facebook, njerëz të librit e kulturës, shkrimtarë, studiues, botues, përkthyes e pedagogë as do të guxojnë t’i bëjnë “lajkë” këtij statusi! Paçka se e mendojnë si unë, paçka se janë pjesë e këtij mjerimi!
/Marrë nga Facebook-u i autores/
Discussion about this post