Presidenti amerikan, Joe Biden, ka thënë se 11,000 persona janë evakuuar nga Kabuli gjatë fundjavës dhe është zotuar që do t’i ndihmojë të gjithë amerikanët që duan të largohen nga Afganistani.
Biden tha të dielën se prioriteti i tij fillestar është largimi i shtetasve amerikanë nga Afganistani, “sa më shpejt që të jetë e mundur”.
“Ne jemi duke punuar shumë dhe sa më shpejt që mundemi për të nxjerrë njerëzit. Ky është misioni ynë. Ky është qëllimi ynë”, ka thënë Biden para gazetarëve.
Presidenti amerikan kanë thënë po ashtu se ka aktivizuar flotën ajrore të ofruar nga kompanitë ajrore komerciale, për të ndihmuar në bartjen e refugjatëve.
Biden shtoi se ende shpreson që të finalizohet evakuimi dramatik nga Afganistani deri më 31 gusht, mirëpo ka të lënë mundësinë për zgjatje të afatit nëse është nevoja.
Biden gjithashtu tha se tërheqja amerikane tani është e arsyeshme, pasi forcat amerikane janë siguruar që Afganistani nuk do të bëhet më bazë për xhihadistë të huaj që të kryejnë komplote kundër Perëndimit.
