Presidenti Joe Biden, i ka dërguar një letër presidentes së Kosovës, Vjosa Osmanit, ku e ka uruar për përvjetorin e 14-të të pavarësisë.
Në letrën dërguar Osmanit, Biden tha se Uashingtoni vazhdon të mbështesë dialogun midis Kosovës dhe Serbisë, që sipas tij, duhet të përfundojë me njohje reciproke.
“Jemi të kënaqur që Kosova po vazhdon të ndërtojë dhe forcojë marrëdhëniet e saj pozitive me vendet fqinje dhe do të vazhdojmë të mbështesim përpjekjet tuaja drejt një marrëveshjeje gjithëpërfshirëse të normalizimit me Serbinë, të përqendruar në njohje reciproke”, ka shkruajtur Biden.
Shtetet e Bashkuara dhe Bashkimi Evropian i kanë bërë thirrje Kosovës dhe Serbisë t’i kthehen dialogut të ndërmjetësuar nga blloku evropian si dhe të zbatojnë marrëveshjet e arritura në këtë proces, që ka nisur më 2011. Takimi i fundit në nivel të lartë politik midis Kosovës dhe Serbisë ka ndodhur në korrik të vitit 2021.
Teksa uroi popullin e Kosovës për përvjetorin e pavarësisë, presidenti Biden tha Kosova në 14 vjetët e pavarësisë ka bërë përparim dhe është “shndërruar nga një demokraci e brishtë në një shtet të gatshëm për të ndarë përvojat e veta me botën”.
Discussion about this post