Biden njofton: Më shumë armë dhe sanksione kundër Moskës

Shtëpia e Bardhë ka lëshuar një deklaratë në lidhje me vizitën e Joe Biden në Ukrainë këtë mëngjes.

“Ndërsa bota po përgatitet të shënojë përvjetorin e pushtimit brutal të Ukrainës nga Rusia, unë jam sot në Kiev për t’u takuar me Presidentin Zelensky dhe për të riafirmuar angazhimin tonë të palëkundur ndaj demokracisë, sovranitetit dhe integritetit territorial të Ukrainës.

Kur Putin filloi pushtimin e tij gati një vit më parë, ai mendoi se Ukraina ishte e dobët dhe perëndimi ishte i ndarë. Ai mendoi se mund të na kalonte. Por ai e kishte gabim.

Sot, në Kiev, po takohem me Presidentin Zelenskiy dhe ekipin e tij për të disktuar mbi mbështetjen tonë për Ukrainën.

Do të njoftoj dërgimin e disa mjeteve të tjera kritike, duke përfshirë municione artilerie, sisteme anti-blindash dhe radarë të mbikëqyrjes ajrore për të ndihmuar në mbrojtjen e popullit ukrainas nga bombardimet ajrore.

Dhe gjatë kësaj jave, ne do të shpallim sanksione shtesë kundër elitave dhe kompanive që po përpiqen të shmangin ose të mbushin makinerinë ruse të luftës.

Gjatë vitit të kaluar, SHBA-ja ka ndërtuar një koalicion kombesh nga Atlantiku në Paqësor për të ndihmuar në mbrojtjen e Ukrainës me mbështetje të paprecedentë ushtarake, ekonomike dhe humanitare  dhe kjo mbështetje do të zgjasë. 

Unë gjithashtu pres me padurim të shkoj në Poloni për të takuar Presidentin Duda dhe udhëheqësit e aleatëve tanë në krahun lindor, si dhe për ti treguar se si Shtetet e Bashkuara do të vazhdojnë të bashkojnë botën për të mbështetur popullin e Ukrainës dhe vlerat thelbësore të të drejtave të njeriut dhe dinjitetit në Kartën e OKB-së,” thuhet në deklaratën e Shtëpisë së Bardhë.

Duke folur pas bisedimeve të zhvilluara nga dyshja, Zelensky tha se mbështetja ushtarake do të jetë 500 milionë dollarë por më shumë detaje do të bëhen të ditura të martën.