Në takimin e parë të nivelit të lartë të zhvilluar sot në Shtëpinë e Bardhë, presidenti Joe Biden, u kërkoi pjesëmarrësve që të kenë në fokus progresin e demokracisë. Presidenti Biden tha se në këndvështrimin e tij, demokracia është sfida themelore e kohës që po jetojmë dhe prandaj të gjithë duhet të përpiqemi më shumë për të mos cenuar të drejtat dhe liritë njerëzore.
“Jemi në një pikë kthese në histori sipas mendimit tim. Zgjedhjet që bëjmë tani do të përcaktojnë rrënjësisht drejtimin që do të marrë bota në dekadat e ardhshme A do të lejojmë që hapat prapa lidhur me të drejtat dhe demokracinë të vazhdojnë të pakontrolluar, apo do të kemi së bashku vizionin dhe guximin, të udhëheqim edhe një herë përpara marshimin e përparimit njerëzor dhe lirisë njerëzore “, tha presidenti Biden.
Kujtojmë se, ky takim vjen ndërsa demokracia amerikane përballet me sfida ndaj institucioneve dhe traditave të saj institucionale, përfshirë sulmin e 6 janarit në Kapitol dhe pretendimeve të rreme të Donald Trumpit për zgjedhje të vjedhura. Në fjalimin e tij, Presidenti Biden shpalli Nismën Presidenciale për Ripërtëritjen e Demokracisë. Shtetet e Bashkuara po planifikojnë të japin deri në 424.4 milionë dollarë për këtë nismë.
Discussion about this post