Një 24-vjeçare shqiptare, e cila ndodhej prej dy vitesh në Itali, humbi jetën tragjikisht pasi ra nga një lartësi, në përpjekje për të hyrë në banesën e saj, pasi dera ishte mbyllur nga brenda.
Ngjarja ka ndodhur në qytezën Barcellona Pozzo di Gotto në Siçili, ndërsa viktima është identifikuar si Ambra Seferi.
Mediat italiane bëjnë me dije se 24-vjeçarja kishte dalë nga shtëpia kur iu mbyll dera nga brenda. E shqetësuar se brenda shtëpisë ndodhej djali i saj 18 muajsh dhe një vajzë dyvjeçare, vajza e shoqes, Ambra tentoi të hynte duke kaluar përmes çatisë.
Për fat të keq, ajo shkeli në një dritare xhami që ndodhej në çati dhe u rrëzua. Pavarësisht se u transportua me urgjencë në spitalin Milazzo dhe iu nënshtrua ndërhyrjeve reanimatore, 24-vjeçarja ndërroi jetë.
Ambra kishte mbërritur në Itali dy vjet më parë dhe vdekja e saj la komunitetin lokal të tronditur dhe të pikëlluar.
Discussion about this post