Bie nga lartësia, ndërron jetë një punëtor në ‘Trepça’

Një person ka ndërruar jetë sot në vendin e tij të punës, përkatësisht në kompleksin industrial “Trepça” në Mitrovicë.

Lajmin e ka konfirmuar zëdhënësi i Policisë për rajonin e Mitrovicës, Avni Zahiti, i cili ka bërë të ditur se viktima është i moshës 58-vjeçare.

Sipas Zahitit, nga hetimet fillestare dyshohet se viktima ka rënë nga një lartësi e objektit.

“Rreth 07:00, policia ka pranuar informatën se në vendin e tij të punës brenda kompleksit industrial ‘Trepça’ është gjetur pa shenja jete viktima mashkull 58-vjeçar. Bazuar në hetimet fillestare dyshohet se viktima ka rënë nga një lartësi e objektit. Hetuesit policor me autorizim të prokurorit kanë nisur hetimet për identifikimin dhe zbardhjen e rrethanave të rastit”, ka bërë të ditur Zahiti.

Rasti është cilësuar si “Vdekje e dyshimtë”.