Na ndajnë vetëm tre ditë nga 1 maji, datë që sipas qeverisë do “shkatërrojë” sistemin e ryshfetit dhe vonesat e marrjes së shërbimit nga qytetarët duke i kthyer të gjitha shërbimet online pa qenë nevoja për sportele fizike.
Ndonëse reagimet ishin të shumta pasi herë pas here sistemi i e-albania nuk është funksional, kryeministri Rama dha garanci se shërbimet do të merren në kohë.
Por vetëm dy ditë para këtij ndryshimi rrënjësor, Drejtoria e Transportit Rrugor është përfshirë në kolaps për shkak të mos funksionimit të sistemit të gjendjes civile duke shkaktuar radhë të gjata në zyrat e shërbimeve për qytetarët. Çështja thellohet nga fakti që administrata është pesë ditë pushim javën që vjen për shkak të festës së Fiter Bajramit, prandaj shërbimet që duhet të merreshin sot, do merren të mërkurën.
Mjafton vetëm ky rast që e gjithë propaganda e qeverisë të bjerë poshtë. Sistemi i ri i sporteleve dixhitale pritet që të shkaktojë një kaos të madh pasi numri i qytetarëve të informuar është i ulët, ndërsa herë pas herë mungon dhe aksesi në internet.
Megjithëse këto probleme mund të jenë të parëndësishme krahasuar me faktin kur sistemi e-albania të mbingarkohet dhe të mos jetë funksional duke i shkaktuar probleme të mëdha qytetarëve që kanë nevojë për shërbime të shpejta.
Discussion about this post