Nëse vera që po lëmë pas gjallëoi turizmin e goditur nga pandemia në shumicën e vendeve, nuk mund të thuhet e njëjta gjë për Brukselin. Qendra turistike e kryeqytetit belg ka humbur më shumë se 70% të qarkullimit të saj në krahasim me verën e vitit 2019″. Fabian Hermans, administrator i Federatës Horeca Bruksel, thotë se qyteti i ngjante një shkretëtire gjatë muajve të verës.
Brukseli është bosh nga turistët, si në koma artificiale. Ka karrige nga të kthesh sytë, por asnjë klient nuk ulet në to. Është një katastrofë!
Edhe shoqata e hotelierisë raporton të njëjtin realitet të zymtë. “Shkalla e prenotimit për muajt korrik dhe gusht është 25% dhe 28%, përkundër 79% dhe 68% në vitin 2019”, vëren Rodolphe Van Weyenbergh, sekretar i përgjithshëm i Shoqatës së Hoteleve në Bruksel (BHA). “Situata është e papërballueshme. Nga fillimi i vitit 2021 deri në fund të gushtit, rënia në total e qarkullimit në krahasim me të njëjtën periudhë të vitit 2019 është 80%,” shton ai.
Qarkullimi aq i zymtë sa moti
Turizmi duket se është goditur në mënyrë të veçantë nga puna në distancë. “80% e hoteleve të qytetit varen nga klientët ndërkombëtarë dhe turizmi i biznesit”, nënvizon Van Weyenbergh. “Përpara se puna dhe takimet në distancë të bëheshin normë, udhëtarët e biznesit mbushnin hotele dhe argëtoheshin në restorante dhe bare në Bruksel. Por, sot, kompanitë i kufizojnë konferencat dhe seminaret e tyre në minimum”, thotë Hermans. Turistët belgë, nga ana e tyre, preferojnë bregdetin para kryeqytetit.
Përveç krizës shëndetësore dhe rreziqeve të saj, edhe moti ka luajtur rol negativ. “Midis rihapjes së restoranteve më 8 maj dhe 5 gusht, kishte 78 ditë rresht me shi, përfshirë 26 ditë me stuhi,” thotë Hermans.
Perspektiva për shtatorin nuk është më e mirë. Shkalla e prenotimeve për fillimin e vitit shkollor luhatet midis 8% dhe 10% kundrejt 20% në kohë normale.
