Ka qënë një nga personazhet më të fuqishme në panoramën futbollistike italiane, por skandali i vitit 2006, e nxorri “offside”, duke bërë që të përjashtohej përjetësisht nga futbolli. Megjithatë, sa herë që flet, të gjithë kthehen e dëgjojnë.
Luciano Moggi, ish-drejtuesi i njohur i Juventusit, është i ndërgjegjshëm se skuadra më e fortë në këtë sezon në Itali është Interi. Klubi ka bërë lëvizje të goditura në merkato dhe që në start, loja e Interit ka lënë mbresa në ndeshjet e zhvilluara deri tani.
Në një editorial në “Libero”, edhe “Big Lucciano” i zikaltërve, ka pranuar se ata janë “edhe më të fortë se vitin e kaluar”, duke theksuar se cilat ishin pikat ku mbështetej skuadra e Inzaghit.
“Zikaltrit kanë fituar në Cagliari me një lehtësi çarmatosëse, meritë e një mesfushe që bën të lëvizë topi me shpejtësi, aq sa i merr mendtë kundërshtarëve, me mbivendosje perfekte si ajo e Thuram dhe Dumfries në aksionin e golit të parë. Kthjelltësia e Lautaros, tipike e një sulmuesi race, ka bërë pjesën tjetër.
Çalhanollu është truri, dhe pasimet e tij gjejnë gjithmonë shokë skuadre lirshëm. Barella është njeriu i cili di të fitojë topin për të rinisur skuadrën dhe për pjesën tjetër mendojnë sulmuesit. Do të jetë një kundërshtar i vështirë për të gjithë”, shkruan Moggi ne editorialin e tij.
Discussion about this post