Qytetarët e gjashtë bashkive u janë drejtuar qendrave të votimit për të zgjedhur kryetarin e tyre për një mandat 1-vjeçar. Në raportimin e KQZ deri më orën 17:00, vihet re se Dibra ka numrin më të lartë të votuesve me rreth 40%.
Pas Dibrës, i renditur me pjesëmarrje më të lartë është ai i Vorës, ku rreth 38% e qytetarëve kanë zgjedhur të shprehin të preferuarin e tyre me anë të votës.
Lushnja vjen e treta nga renditja me rreth 33%, ndjekur nga Rrogozhina me rreth 28 %. Kurse pjesëmarrja më e ulët e votuesve, deri në këtë orë, u shënua në Shkodër me rreth 26% dhe Durrës me 24 %.
Ka nisur prej orës 07:00, të mëngjesit të sotëm procesi i votimit për zgjedhjet e pjesshme vendore në 6 bashki të vendit. Në listat e votimit janë rreth 654 mijë shtetas shqiptarë me të drejtë vote që janë ftuar të marrin pjesë në votime për të zgjedhur kryetarët e rinj të bashkive në Vorë, Rrogozhinë, Lushnjë, Shkodër, Dibër dhe Durrës. Qendrat e votimit mbyllen në 19:00.
Discussion about this post