Autoritetet në Çeki kanë sekuestruar 840 kilogramë kokainë, të cilat janë gjetur në arkat e bananeve në supermarketet e dy qyteteve të ndryshme në Çeki. Si duket trafikantët kishin harruar të merrnin ngarkesën me kokainë në momentin e mbërritjes në Çeki.
Sipas policisë vendase, vlera e drogës kap shifrën e 81 milion eurove. Stafi i supermarketit në qytetet Jicin dhe Rihnov nad Knježnoj informoi policinë pasi gjeti përmbajtje të dyshimtë në kuti.
Policia tha se ka kontrolluar edhe vende të tjera ku janë dorëzuar kutitë e së njëjtës ngarkesë.
Mediat raportuan se bananet mbërritën në Çeki nga Kolumbia. Kujtojmë që një ditë më parë u kapën në Selanik të Greqisë, 300 kilogramë kokainë po ashtu e fshehur brenda një kontejneri me banane. Droga e sekuestruar kishte ardhur nga Kolumbia dhe gjatë operacionit ranë në pranga 4 persona.
Discussion about this post