Zëdhënësi i Kremlinit, Dimtry Peskov, ka deklaruar ditën e sotme se, telefonata e planifikuar mes Presidentit rus Vladimir Putin dhe Presidentit të Shteteve të Bashkuara Joe Biden pritet të jetë e gjatë dhe do të flitet me detaje për disa çështje.
Dimtry Peskov tha se Ukraina dhe prezenca e NATO-s pranë kufijve të Rusisë pritet të jenë fokusi i bisedës. Ndërsa tregohet se ky diskutim vjen si pasojë e tensioneve të krijuara mes Shteteve të Bashkuara dhe Rusisë për shkak të rritjes së pranisë ushtarake ruse përgjatë kufirit ukrainas, që shikohet si shenjë e një pushtimi të mundshëm.
Zoti Peskov përsëriti se Presidenti rus Putin do të kërkojë garanci se NATO nuk do të zgjerohet deri në Ukrainë. Marrëdhëniet Rusi-SHBA kanë qenë të paqëndrueshme që kur mori detyrën Presidenti Biden.
Administrata e tij vendosi sanksione ndaj objektivave ruse dhe denoncoi publikisht zotin Putin për ndërhyrjen e Kremlinit në zgjedhjet amerikane, për aktivitetin kibernetik kundër kompanive amerikane dhe për trajtimin e udhëheqësit opozitar Alexei Navalny, i cili u helmua vitin e kaluar dhe më vonë u burgos.
Gjatë takimit Putin-Biden të zhvilluar në muajin qershor në Gjenevë, presidenti amerikan paralajmëroi se nëse Rusia do të kalonte vijën e kuqe, përfshirë sulmet ndaj infrastrukturës kryesore amerikane, administrata e tij do të përgjigjej dhe se “pasojat do të ishin shkatërrimtare”.
Discussion about this post