Zëvendëkryeministri, Besnik Bislimi ka thënë se Kosova vazhdimisht ka paralajmëruar ndërkombëtarët për arsyet e vërteta pse Serbia insiston në themelimin e Asociacionit të komunave me shumicë serbe, shkruan Gazeta Online Reporteri.net.
Në një postim në Twitter, Bislimi thotë se qëllimi i Serbisë nuk ishte integrimi i serbëve vendas në Kosovë, por për ta bërë jofunksional shtetin.
“Kosova vazhdimisht ka paralajmëruar komunitetin ndërkombëtar për arsyet e vërteta të Serbisë për insistimin e formimit të Asociacionit të komunave me shumicë serbe. Asociacioni i komunave me shumicë serbe nuk kishte për qëllim asnjëherë të integronte serbët vendas në Kosovë, por si kali i Trojës së Beogradit për ta bërë vendin jofunksional, duke përgatitur kështu rrugën për ndarje”.
Emri i akademikut serb që e ka përgatitur këtë draft është Vasilije Krestiç.
“’Non-paper’ i kohëve të fundit i hartuar nga Akademia Shkencave dhe Arteve e Serbisë ofron dëshminë e fortë deri tash të qëllimeve të vërteta prapa ngulmimit të Serbisë për Asociacionin në Kosovë.
Themelimi i Asociacionit të Komunave me Shumicë Serbe nuk është objektiv në vetëvete, por më shumë përfaqëson një hap të rëndësishëm drejt qëllimit gjithëpërfshirës të ‘botës serbe’ (Srpski svet) që përkon me territorin e ish-Jugosllavisë.
Plani fillestar i Asociacionit është i parëndësishëm, pasi kompetencat e tij do të evoluojnë dhe do të shfrytëzohen për shkak të mbështetjes financiare të Beogradit si dhe mungesës relative të mbikëqyrjes nga Qeveria e Kosovës. Këto kompetenca do të çojnë përfundimisht në një Republika Srpska të re me qëllimin e ndarjes territoriale. Kjo pastaj do ta detyrojë komunitetin ndërkombëtar të njohë ekzistencën e dy entiteteve kombëtare në Kosovë dhe autonominë absolute në zonat e Asociacionit.
Kjo autonomi do të bëjë që serbët të kenë zero nevojë për të ndërvepruar me Qeverinë e Kosovës, duke e bërë kështu Asociacionin një ‘vezë qyqeje’ në territorin e Kosovës. Serbia beson se avantazhi kryesor krahasues që ka aktualisht dhe duhet ta shfrytëzojë, është epërsia ekonomike në rajon. Në rrethanat aktuale, qëllimi përfundimtar i ‘botës serbe nuk mund të realizohet vetëm me mjete politike. Duhet të shfrytëzohen edhe mjete të tjera, duke përfshirë mekanizmat fetarë me potencial për ndikim politik në vendet fqinje ku vepron Kisha Ortodokse Serbe”, ka përfunduar Bislimi.
Discussion about this post