Dhoma Ekonomikë e Gruas nga një vëzhgim që ka bërë në terren gjatë shtatorit ka dalë në konkluzionin se, bizneset e vogla ende nuk janë gati të përdorin sistemin e faturimit elektronik, gjë që mund të sjellë gabime në raportimin e faturave.
Për këtë arsye, kjo organizatë do të dorëzojë pranë Drejtorisë së Përgjithshme të Tatimeve një kërkesë që të shtyhet aplikimi i gjobave për gabime deri në mesin e vitit të ardhshëm.
Aktualisht po zbatohet faza e fundit e reformës së fiskalizmit që ka të bëjë më transaksionet biznes konsumator dhe sipas të dhënave nga tatimet, rezultojnë mbi 32 mijë biznese të fiskalizuara dhe mbi 38 milionë fatura të Fiskalizuara që prej datës 1 Janar të këtij viti. Administrata tatimore nuk do të aplikojë gjoba për sipërmarrjet që plotësojnë fatura me gabime deri në fund të vitit.
