Bizneset në vend kundërshtojnë taksën e qumështit dhe ndryshimet e tjera në paketë fiskale, duke thënë se nuk po i lehtësojnë ata por rrisin më tej barrën fiskale për sipërmarrjen. Në një prononcim për mediet, kreu i Dhomës së Tregtisë, Nikolin Jaka tha se masa të tilla si taksa për qumështin pluhur krijon skema abuzive. “Taksa e qumështit për hir të së vërtetës edhe ne e duam, jo vetëm për atë por për të gjitha produktet që futen nga jashtë dhe mund të jenë rrezik për produktet e fermerit. Nëse vihet kjo taksë për qumështin pluhur normalisht duhet të përjashtohet sektori i prodhimit i cili e ka të lejuar prodhimin e produkteve me bazë qumështin pluhur të miratuar nga AKU me etiketë ligjore”, tha Nikolin Jaka.
Fermerët thonë se, qeveria po bën ndryshime fiksale të pa menduara mirë, cka mund të sjellë pasoja të renda tek sipërmarrësit. “Ministria e Financave nuk e ka mirë menduar pasi ne mund ti vendosim barrierë qumështit pluhur, por ndërkohë lejojmë produkte me përmbajtje të qumështit pluhur nga importi që hyjnë dhe konkurrojnë me çmimin më të lirë prodhimet vendase”, tha Ervin Resuli.
Skeptikë ata janë edhe për ndryshimet e tjera të taksave në bujqësi si ajo për zerimin e rimbursimit të TVSH-së nga 6% dhe rikthimin e asaj 10% për inputet bujqësore. “Kjo paketë fiskale është kirurgjia më e rrezikshme që i bëhet sipërmarrjes private sepse ndërhyn në sektorin e prodhimit, duke filluar nga heqja e 6% të tvsh-së për fermerët, nga akciza e gazit ku ne aktualisht përballemi me një rritje të çmimit të tij, i bie që sipërmarrja private të rrisë kostot me minimalisht 20%”, shprehen ata.
Duke vënë në dukje këto rreziqe që sjellin ndryshimet në paketën fiskale, ata kërkojnë një rishikim të saj dhe konsultimin me grupet e interesit.
Discussion about this post