Tre biznesmenët italianë, Umbro Staccini, që zotëron kompanitë “Servizi Italia”, “Tecnosanimed” dhe “U.Jet S.r.l” , dhe 2 aksionerët e tjerë të këtyre subjekteve, Elisabetta Anzanello e Giorgio Tardioli kanë njoftuar se nuk do të paraqiten në Komisionin Hetimor të Shëndetësisë.
Kryetarja e komisionit që heton koncesionin e Sterilizimit dhe Check-up, Albana Vokshi tha në nisje të seancës se 3 shtetasit italianë, të cilët parashikohej të pyeteshin sot nga ligjvënësit kanë refuzuar të marrin pjesë, duke e argumentuar mungesën me angazhimet personale.
Kjo është hera e tretë sipas Vokshit që biznesmenët italianët kanë refuzuar pjesëmarrjen e tyre për të dëshmuar, ndaj sipas saj në vijim do duhet që të veprojë policia e shtetit që të mundësojë ardhjen e tyre në Komisionin hetimor parlamentar.
I njëjti problem është hasur edhe me dy dëshmitarët shqiptarë, Artan Lleshi dhe Altin Fani.
Vokshi u shpreh se Lleshi refuzoi edhe dëshminë gjatë së premtes duke paraqitur një epikrizë, ndërsa për sot ka paraqitur një raport me fuqi prapavepruese “me çudira në aspektin e afateve”.
“Umbro Staccini, Elisabetta Anzanello dhe Giorgio Tardioli janë përgjigjur me e-mail për shkak të angazhimeve personale dhe të punës në Itali e jashtë Shqipërisë, por edhe kohës së shkurtër të njoftimit. I kemi thirrur 3 herë dhe e kanë të pamundur të organizojnë udhëtimin drejt Shqipërisë. Është hera e tretë që refuzojnë. Dëshmia e 3 shtetasve është kyçe për hetimin parlamentar. Janë jo vetëm aksionerë në koncesionin e sterilizimit. Dy prej tyre kanë marrë edhe miliona lekë me konsulencë private. Kanë dhe kompani nënkontraktuese dhe marrin paratë e shqiptarëve nga të gjitha xhepat. Parashikon thirrjen e tyre duke njoftuar policinë dhe policia të sigurojë praninë e tyre në komision”, tha Vokshi.
Discussion about this post