Ministria e Drejtësisë ka përcjellë pranë autoriteteve franceze dokumentacionin zyrtar për ekstradimin e biznesmenit Ermal Beqiraj, i arrestuar pak ditë më parë në Francë.
Burime pranë Prokurorisë së Posaçme bëjnë me dije se, pas kërkesës së SPAK, ministria ka dërguar dokumentet përkatëse te autoritetet ligjzbatuese franceze, duke nisur zyrtarisht procedurat për kthimin e tij në Shqipëri.
Në dosjen e ekstradimit është përfshirë edhe vendimi i Gjykatës së Posaçme, e cila ka caktuar ndaj Beqirajt masën e sigurisë “arrest në burg”, pasi ai dyshohet për kryerjen e shtatë veprave penale.
Beqiraj u arrestua nga autoritetet franceze pasi u kap duke fluturuar me një avion privat mbi një central bërthamor.
Ndërkohë, dy ditë më parë, SPAK kërkoi sekuestrimin e pasurive të tij në Francë, të dyshuara se rrjedhin nga veprimtari kriminale. Kërkesa përfshin llogari bankare me vlerë mbi 2 milionë euro, dy apartamente, një kështjellë në departamentin Oise me vlerë rreth 2.6 milionë euro, si edhe mjete motorike.
Biznesmeni kërkohet nga SPAK në kuadër të hetimeve për abuzimet e dyshuara me tenderët e Agjencisë Kombëtare të Shoqërisë së Informacionit (AKSHI).
Ndaj tij janë ngritur akuzat për “konkurrencë të paligjshme nëpërmjet dhunës”, “heqje të paligjshme të lirisë”, “shkelje të barazisë së pjesëmarrësve në tendera apo ankande publike”, e kryer në kuadër të një grupi të strukturuar kriminal, “grup i strukturuar kriminal”, “kryerje e veprave penale nga organizata kriminale dhe grupi i strukturuar kriminal”, “pastrim i produkteve të veprës penale ose veprimtarisë kriminale”, si dhe “korrupsion aktiv i personave që ushtrojnë funksione publike”.
Discussion about this post